法证先锋6丨孟希璘打破短髮限制唔演警察转演论尽经理人

法证先锋6丨孟希璘打破短髮限制唔演警察转演论尽经理人大讚蒋祖曼是“演员收割机”超关心人

憑《愛‧回家之開心速遞》中的Laptop角色成功入屋、在《明星運動會前哨戰 : Fight盡》有亮麗表現的孟希璘（Ball），在新劇《法證先鋒VI：倖存者的救贖》中有不少發揮機會，雖然一方面經常Part住老細娜娜（蔣祖曼飾）唱雙簧、感情好兼默契足；但另一方面又因烏龍欠細心，經常激到娜娜生蝦咁跳，這位烏龍經理人可樂認真令人有印象。

對於今次飾演烏龍經理人「可樂」一角，孟希璘表示很開心能在較沉重的正劇中負責發放歡樂，並可自行創作punchline發揮。她指雖然自己場口不多，但慶幸內地社交網站迴響不錯，又指可樂跟自己性格貼近：「幾貼近我本人，好玩得，有時想整蠱身邊嘅人咁。我覺得可樂呢個經理人成日好似陰咗佢老細咁，娜娜因為一啲好嚴重嘅問題，所以搬咗去Bosco隔籬，但我居然仲成日掉低佢唔理。」續「劇透」指演員們看到後續的劇情，紛紛討論「可樂」是否才是Big Boss，她笑謂：「佢哋話有乜理由每次喺最重要時候我都走咗去，或者突然間消失咗！」

孟希璘指以往較常演偏向冷酷、堅毅的警察，大多數角色都很有發揮，只是她更感恩今次獲機會突破傳統飾演非「短頭髮特定角色」，並感謝監製小龍找其出演可樂，又謂不擔心「童顏臉」影響角色說服力：「依家公司嘅經理人都好後生。」

談到與蔣祖曼Joman合作，孟希璘對這位對手人品及專業度均讚不絕口，並笑指Joman是「演員收割機」，合作過的演員對她有讚無彈：「佢人品太好喇，係大愛嗰種人！無論台前幕後一聽到我同蔣祖曼合作，第一句一定係『恭喜你』。佢係一個無論開工有幾攰、自己有幾辛苦，佢都係超關心人，同佢開工有一種，就算今日好攰，都會覺得同Joman開工真係好。」她透露Joman為演活國際名模，刻意生酮飲食減肥，但對方在吃健康餐時，仍不忘關心希璘的飯盒不夠肉類：「佢知我鍾意食肉，猛問我夠唔夠肉食，要唔要幫我嗌外賣，佢會不停咁諗人哋。」並感激Joman在角色鑽研方面幫了她很多，不斷與希璘細心鑽研場口可能性務求精益求精。

希璘又指與「兒時男神」黃宗澤（Bosco）合作亦相當愉快，她指Bosco在片場時雖然表現嚴肅，但對台前幕後人員都相當照顧，經常萬歲請食「好西」。她透露第一天開劇便與Bosco演對手戲，雖然對白不多但因稍為蹺口，故多次NG，但Bosco不但零怪責，更竭盡所能協助她，希璘說：「Bosco每一次畀足所有反應，亦冇怪我。休息準備下一場嘅時候，佢問我係咪好緊張，係咪今年訓練班，我話唔係入咗嚟幾年喇，佢都即刻笑話：『係咩？』，後尾傾多兩句，佢話記得我喺前年台慶有一分鐘講自己身體唔好但都捱過咗，佢話少少狀態唔好唔緊要，總之放鬆就OK。佢個人性格比較輕鬆，唔會畀壓力人，二來佢好專業，好多謝佢。」

孟希璘來自演藝世家，父親孟龍是邵氏演員兼曾獲「金馬獎」最佳動作設計，二伯父孟海曾獲「金像獎」最佳男配角殊榮，大姑媽孟秋則是一名武打演員。孟希璘患有罕見病，關節長期腫痛又會經常發熱，曾被醫生指30歲時需要坐輪椅，但她最終憑藉堅毅意志及樂觀正向的心態，成功走出陰霾，並曾於專訪透露現在只要不常捱夜工作便可。