臥底嬌娃｜結局周爆点：關禮傑變臉邵美琪淚崩神鬥戲！馬貫東陳瀅親身上陣柔道大戰

《臥底嬌娃》進入結局周，今晚（23日）一集連場好戲上演，既有陳瀅同馬貫東嘅柔道大戰，又有關禮傑同邵美琪嘅高手過招，火花四濺。

馬貫東陳瀅親身上陣柔道大戰 陳瀅被撻落地冇嗌辛苦

劇情講到柔道高手妙姿（陳瀅飾）同奕風（馬貫東飾）對打，最初奕風明顯讓賽，妙姿叫佢唔好相讓，話「我要真真正正同你打番場」。之後兩人眼神有火各不相讓，互相撻來撻去，妙姿更女力士上身想抱起奕風，打得難分難解。一班觀眾都話陳瀅簡直係「女力士」，又話估唔到佢「撻人咁勁」，笑言「唔敢得罪佢」。

馬貫東接受tvb.com獨家訪問時直言呢場戲兩人親身上陣，更大讚陳瀅非常敬業：「有次撻得佢幾傷，因為我跣手捉唔住佢個領，跟住佢就真係撻咗落地，嗰下撻落去佢應該幾暈，所以之後佢都要唞咗陣先再拍，但佢冇講過辛苦，非常捱得。」佢話呢場戲拍咗幾個鐘，係體力大考驗：「拍完武術指導要嘅嘢之後，都有繼續roll機畀我哋自由搏擊，拍完之後成個人都散晒。」

陳瀅早前受訪都話最難忘同馬貫東對打，仲爆料：「我記得拍完嗰場戲後，阿東周圍同人講『唔好追陳瀅，佢好恐怖』，因為我好大力，同埋追住佢嚟打，就算導演叫Cut，我都唔識得停，不停追住佢，佢好驚，好搞笑。」

**關禮傑變臉邵美琪淚崩 高手過招火花四濺**

另一場重頭戲，係關禮傑同邵美琪嘅鬥戲。劇情講到索帕（吳子冲飾）被捕後供出劉彪（關禮傑飾）係幕後主謀，邦妮（邵美琪飾）探監時對佢好失望：「你連你嘅親生仔都想殺，我先知道咁多年嚟，你嘅好老公好老竇係戲嚟。」劉彪即時「變臉」激動拍枱話：「因為你鍾意睇，我係咩？四聯姑爺，所有人眼中我只係一個靠老婆上位嘅窩囊廢！」仲威脅邦妮快啲搵律師，否則「最多攬住你一鑊熟」。邦妮終於睇清佢真面目，痛心流淚。

另一場戲，劉彪入獄後見到兒子索帕，扮「好爸爸」話以前唔認佢係逼不得已，但索帕冷淡回應：「你係生係死，我一啲都唔在乎。」TVB

呢兩場戲獲觀眾大讚精彩絕倫，指關禮傑嘅「變臉」演出同邵美琪嘅沉穩內心戲相當到位，盡顯演技功力，留言「邵美琪同傑哥啲戲好好睇」、「原來最奸嗰個係邵美琪」、「佢哋啲戲好精彩」。