講到意大利嘅球場，2032年歐洲國家盃將會由意大利同土耳其合辦，而意大利呢邊嘅主辦城市申請喺7月31號截止，最終有13個城市包括：巴里、博洛尼亞、卡利亞里、佛羅倫斯、熱拿亞、萊切、米蘭、那不勒斯、巴勒莫、羅馬、沙蘭奴、都靈以及維羅納總數16個球場提出申請。

跟住落嚟嘅程序係進行技術審查，內容包括基礎設施、組織、財務狀況同是否合乎歐洲足協要求，而喺10月1號意大利足總將會向歐洲足協提交主辦同埋替代方案名單，歐洲足協就會作出最終決定邊啲球場可以承辦比賽(兩國合辦，意大利同土耳其各佔五個主辦場地）。

現階段除咗祖雲達斯嘅安聯球場符合歐洲足協要求之外，其餘大部份球場一係需要改建，一係就直頭未動工興建，基本上都未能達到相關標準。

意大利青年及體育部長艾博迪強調政府、各城市、各地區、各球會、意大利足總同歐洲足協嘅合作，並且就促進設施嘅現代化，所實施嘅監管措施同建立相關政府專員平台，而計劃牽涉 45 億歐元嘅私人投資。

梅洛尼領導嘅政府都有意推動、協調促成意大利足球體系需要進行嘅改革，睇睇跟住落嚟嘅發展如何。