歌手譚嘉儀尋日（13日）38歲生日，佢同時於社交網宣布獲圈外男友求婚成功，即將下嫁做人妻。未嫁人先興奮嘅佢，尋日梗係要大搞生日P賀一賀佢，同大批圈中好友齊齊分享喜悅，好似王菲、陳懿德、林鈺洧、李芷晴、黃嘉雯、周志文、周志康、翟威廉等，仲準備定兩個靚蛋糕、大紮鮮花送畀壽星女，非常有心。

席間，譚嘉儀親口再同大家宣布多次佢訂婚成功，現場眾人即識做起哄尖叫、狂叫「Oh my god」，一眾女士湧上前圍住影佢手上嘅巨型鑽戒，有人同隻戒指自拍，亦有人不斷恭喜譚嘉儀，男士們則一時扮冷淡，一時又掩面交戲扮震驚，翟威廉更扮嚇到落淚，表示「我冇機會喇…」好友們誇張表現，氹得女主角譚嘉儀笑到見牙唔見眼，場面混亂得嚟又搞笑。