【娛樂新聞】歐瑞偉籲觀眾給予新《愛回家》耐性 回應客串可能：暫時應該唔會.無綫處境劇《愛·回家之開心速遞》早前迎來大結局，由於陪伴觀眾長達九年多，不少網民大感不捨，甚至在Threads上自發為劇中角色開設帳戶互相留言，猶如在網絡世界延續開心速遞宇宙。歐瑞偉昨日（12日）出席TVB《警聲百二秒 IV》開鏡儀式時，透露自己也有留意到這個有趣現象，甚至親自落場參與：「係囉，我仲入咗去裡面，有好多同事都入咗去，我話我『到咗』，咁囉。大家咁支持，我就入去大家一齊玩。」被問到劇集落幕是否仍在沉澱中，佢坦言一早已經消化咗，但依舊難掩不捨：「話晒拍咗九年幾，我哋都唔捨得，戲裡面同班演員好合拍，好開心，拍得好好。」佢透露完結後外面還有少量拍攝工作，之後就未知。

近日還有另一波「回憶殺」，早在2012年首播的《愛·回家》第一輯中，飾演「KC」歐瑞偉女兒「Candy」的童星黃可盈，近日在社交平台翻貼當年兩父女在車內唱歌的經典片段。昔日的小女孩如今已長得亭亭玉立，更成為女團IdG Sundae成員。歐瑞偉直言見到時都很驚喜：「已經係12年前嘅事，個畫面我都仲記得，嗰日突然之間諗喺架車度有咩可以玩，兩父女，不如唱歌？咁就聽返下，之後唱返。」得知「女兒」已經出道成為藝人，佢立即隔空送上祝福：「我都係最近先知，加油呀！」至於將來會否有機會兩父女「合體」演出？佢抱持開放態度：「世事嘅嘢真係唔知，可能真係有機會，如果有機會都幾好玩，幾得意。」

舊作「珠玉在前」，令新劇《愛．回家之三代同糖》開播初期便出現負評。歐瑞偉以過來人身分呼籲觀眾多給予耐性和機會：「一定要鋪嘅，因為角色要慢慢慢慢鋪，比觀眾慢慢伸入去，我當初《愛·回家》都係咁樣。我覺得唔好咁快俾意見，俾多啲機會，我哋以前嗰輯都係咁樣。」佢指目前只播了幾集，觀眾需要時間慢慢認識演員，深信時間一長，觀眾自然會投入新角色的魅力之中。有網民推測若新劇收視未如理想，或會邀請舊作演員回去「救亡」，問歐瑞偉會否有機會客串，佢透露：「真係唔知，但係呢樣嘢真係要睇編劇、睇公司，陸續有人返入去我都相信會有嘅，但係有冇自己份，暫時應該唔會。」TVB