【On.cc】陳自瑤爆13歲女兒同自己一樣高　預告工作有新方向

藝人陳自瑤（YoYo）今日（30日）以黑色露肩連身褲上陣出席電子產品發布會，她表示自己及13歲女兒也經常用到電子產品，問到會否制限女兒使用時間？她坦言：「剛開始嘅時候會，因為怕佢用太長時間會傷眼，但就連學校都要佢用電腦去做功課，咁就冇得限制，只可以買啲唔傷眼嘅電子產品。（驚唔驚佢上網亂識朋友？）我個電話同佢個電話係有連接，我會知佢大概上過咩網站，而且我有follow佢嘅社交帳號，不過囡囡已經到咗青春期，同我一樣咁高，之前仲畀人以為我哋係兩姐妹，所以好多嘢都冇得限制佢，只能向佢灌輸正確知識，好似朋友咁溝通。」

另外，講到早前她與楊茜堯在訪問中互送生日祝福，當YoYo祝對方「繼續老公錫晒」時，楊茜堯本想以同一句祝福回敬對方，但卻突然「口窒」，改以「囡囡晒錫」又指對方「陰她」，YoYo更笑言要剪走相關片段，即時引來網民揣測YoYo跟丈夫王浩信是否關係生變，YoYo指當日大家都很開心，強調：「其實冇嘢，冇乜特別，都揣測咗好耐，所以我唔會講咁多，向來唔想回覆咁多。（叫楊茜堯下次小心講嘢？）冇，冇嘢嘅。（會唔會行動證明同老老冇嘢？）唔回應喇！」

至於早前YoYo在社交網晒出凌晨時分在直播結束後倦極坐在地上吃麵包醫肚的片段，她笑言片段播出後，現在不用吃包，改為吃粥：「其實做直播帶貨真係好用腦，係精氣神嘅挑戰，隨時一做就要4、5個鐘。」又指最近忙拍劇及直播而在不同內地城巿穿梭，雖然很累，但開心可以挑戰不同範疇，並預告將有工作新方向。

陳自瑤灌輸女兒正確知識，好似朋友咁溝通。

陳自瑤預告工作有新方向。

大送心心！

陳自瑤與女兒舊合照。