非常檢控觀獨家｜吳偉豪自爆拍動作戲見血 預告有騷肌半裸場口：瘦到有線條.TVB全新律政劇《非常檢控觀》，將於1月19日八點半翡翠台播映。當中演正氣警察展熊飛的吳偉豪，在劇裏有連場動作戲打得精彩，令人期待！談到今次他要應付不少動作戲，吳偉豪接受tvb.com獨家訪問自言在事前沒有上特別的動作訓練，「拍攝前我都係做多啲Gym，同拉多啲筋裝備好自己，我都知有唔少出拳同踢腿嘅動作，所以最緊要啲筋鬆，出嚟嘅動作先會夠靚。」他自爆曾有一場要爆玻璃場口，不慎弄傷手見血，「拍打戲難免都會受傷，好似啲手臂、手腕會容易有瘀傷，但我覺得唔緊要，都係好小事，最緊要出嚟嘅效果好。」除了打鬥戲外，他預告有騷肌半裸場口，乃是一直以來努力的成果，「我平時都會喺屋企做掌上壓、引體上升同體重訓練，保持個身形，而拍 《非常檢控觀》嘅時候真係好瘦，瘦到啲線條更加出晒嚟」。至於展熊飛這個角色，吳偉豪直言甚有挑戰，「我都好執着自己個戲做得夠唔夠真實同有冇說服力，而監製佢哋亦好注重我出嚟夠唔夠靚仔，所以要同時兼顧呢兩樣嘢都唔係咁容易。」 另外，今次再度與游嘉欣演CP，他直言二人合作得十分舒服，不用刻意營造CP感覺，「因為劇本寫我哋之間嘅感情線好自然，我哋跟住劇本做已經好足夠，出嚟嘅感覺都好好。」TVB