黃宗澤佘詩曼掃獎吸Job　「錢」途無限.出爐雙料視帝視后黃宗澤（Bosco）及佘詩曼（阿佘）前晚出席劇集慶功宴，受惠於劇集大爆，廣告及商演接到手軟，兩人直言要忙到農曆新年才有得抖！Bosco自爆最近接了新的啤酒廣告，戲言之前承諾的「全奶宴」要改為「全啤宴」，認真「錢」途無限！無綫人氣劇集《新聞女王2》在《萬千星輝頒獎典禮2025》橫掃多個獎項成大贏家，前晚劇組筵開13席慶功，總監製鍾澍佳率視后佘詩曼、視帝黃宗澤、「最佳女配角」王敏奕、「最佳男配角」何廣沛、「飛躍進步男藝員」吳業坤、「最佳女新人」倪嘉雯等逾百台前幕後出席，場面墟冚又熱鬧。阿佘和Bosco被問到誰負責找數時三緘其口，笑言總之大家飯後毋須入廚房洗碗。提到Bosco曾揚言要辦全奶宴慶功，他表示要取消：「我簽咗另一個廣告，所以全奶宴要取消，但依家可以搞全啤（酒）宴！」受惠於《新聞2》成功，兩人工作接踵而來，Bosco透露慶功翌日要到內地工作，加上之前忙拍劇，是時候還商演及廣告債，同是廣告女王的阿佘則預計農曆新年後才有時間好好休息。兩人均出名孝順，阿佘計劃陪媽媽旅行，而Bosco指媽媽今個月生日，會為對方辦完大壽再去旅行，問到媽媽的年紀？他醒目表示：「18歲！哈哈！其實媽媽之前話想要部新手機，我另外想買啲首飾畀佢。（買金器？）金器太貴，老人鍾意玉器，或者買舊豬肉，都係肉器。」談到《新聞3》未知何時成事，會否想原班人拍其他題材的劇集？阿佘坦言有好故事當然想原班人馬上陣，在《新聞2》慘遭Bosco欺負的她大膽提議：「我想演殺手殺Bosco，但殺嚟殺去都殺唔死佢。」Bosco指阿佘殺不死他也可以折磨他，或者任由對方欺負也可以，阿佘聞言即說：「諗起都爽！」認為兩人演冤家最好玩。王敏奕斟拍新作另外，王敏奕開心跟吳業坤一同獲獎，講到兩人不但是螢幕CP，亦是「喊包CP」，敏奕否認：「得獎嗰晚我冇佢喊得咁犀利，我平時係喊包，但攞獎時有提醒自己要得體同大方。（吳業坤唔得體？）呢啲係佢風格。」吳業坤坦言恨攞獎，得獎後多了不少工作，揚言下次開演唱會要邀請敏奕擔任嘉賓，並大讚對方歌喉了得。敏奕認同獎項能讓更多監製留意到她，問到是否已有新的演出機會？她說：「都有，但仍然係斟酌中，未正式開工。」藝人高海寧（高Ling）前晚姍姍來遲出席慶功宴，她解釋正在珠海拍攝劇集《璀璨之城》，收工即趕過來，之後又要趕回珠海準備第二天開工，預計農曆新年前拍畢。問到是否會開拍她在《新聞女王》中角色「許詩晴」的外傳？她稱已落實開拍，但寫劇本需時，所以未知開拍日期。提到早前迎來39歲生日，高Ling透露當日獲《璀》劇劇組為她慶祝，好友蔣祖曼及李海銅更專程到珠海陪她，令她相當驚喜：「我連續3年生日都係同助手過，所以今年咁多人同我慶祝好開心。（收到咩生日禮物？）收到好多花，助手、酒店、粉絲、劇組都有送花畀我，但就冇男士送囉！」又指最感動是收到粉絲的親筆信，笑言粉絲比男友更有心，問到會否想有男友陪慶生？她坦言：「隨緣，我連瞓覺都冇時間，遇到啱嘅對象唔會抗拒，順其自然。」無綫小花郭柏妍與何依婷分別因有劇撞期及懷孕，故在《新聞女王2》的戲份甚少，兩人異口同聲表示要爭取《新聞3》的演出，依婷坦言：「我每次見到監製，都會同佢講《新聞3》記得搵我拍，佢話好，會考慮。」另外，早前依婷跟老公及家人到外地滑雪，她稱由於BB年紀細，加上天氣寒冷，故未有同行：「我要喺小朋友大個之前，滑雪滑得叻啲，因為小朋友學嘢好快，我怕追佢唔切。」她透露懷孕前已學滑雪，今次是產後第一擊：「之前擔心生完體能冇之前咁好，原來係唔會，我不但體能好咗，以前滑雪見到斜坡會好驚，依家見到個斜坡，我心諗仔我都夠膽生，斜坡有乜好驚。」而郭柏妍亦是滑雪新手，若有機會想跟依婷一齊拍攝以滑雪為主題的劇集。藝人傅嘉莉（Kelly）在劇集《新聞女王2》中以《刑偵12》的角色出鏡，雖然場口不多，但已令觀眾驚喜萬分，前晚她也有份出席慶功宴，笑言是來沾染大家的喜悅，不敢搶主人家風頭，故刻意穿黑衣及戴帽，打扮低調一點。新一年甫開始，Kelly自爆已有喜訊：「《玫瑰戰爭》嘅監製搵我試唱片尾曲，雖然只係試音，但今次係我第一次試音，所以好緊張，我之前都有跟過音樂老師學唱歌同登台，希望今次可以爭取到呢個機會，新一年除咗演戲外，希望可以發展到其他方面！（你嘅歌喉點？）咁一定唔夠吳業坤好同專業啦！」TVB