【On.cc】張學友開唱獲契爺胡楓捧場　佩服94高齡繼續追夢「歌神」張學友共20場紅館《張學友 60+巡迴演唱會香港終章》將於本月24日圓滿結束，在20號晚的尾四場騷上，為感謝曾合唱《只有情永在》的鄺美雲捧場，特別獨唱《只》歌，又幽默說被合唱歌考起：「除去卡拉OK，都少唱合唱歌，我真係記得歌詞，只係合唱歌唔知幾時係男仔唱，幾時係女仔唱，我搞到亂晒，多謝大家（觀眾）做咗鄺美雲，令我有機會唱番呢首歌，以後會唱多啲合唱歌。」張學友技驚四座。學友表演完一字馬後，解釋必做此指定動作全為證明自己身手敏捷，自言常被朋友問為何不退休，而原因只有一個就是驚：「唔係驚冇錢使，我本身都好慳，有儲錢，算係經濟自由。」又謂曾拍過不少電影，其中一齣《黃飛鴻》正是跟武打巨星李連杰合作，當時被對方的「鴛鴦腳」嚇親：「當時李連杰發生意外，佢其中一隻腳斷咗要打石膏，拍戲要坐喺輪椅度，有日同佢傾偈，佢將佢兩隻腳畀我睇，嘩！嚇得我好驚。」之後用手比劃腳的大細距離甚遠，因此他覺得不可以休息：「如果我休息即係『收工』，我唱埋呢三場半後就『收工』啦，所以我好努力搵啲嘢出嚟做吓，儘快開工，喺舞台同大家見面。」而另一場則獲契爺胡楓大駕光臨，台上的學友話：「平時有嘉賓嚟都好少講，但你老人家嚟，我唔講吓驚對你唔住，有人問胡楓有咩咁巴閉，如果你哋想知，不妨上網搜尋吓佢，我諗佢嗰條…，佢出道至今嘅事蹟，可以睇好耐。」又指契爺唱歌並非最叻，但以94歲之齡仍追夢，確實令他佩服得五體投地：「我有啲嘢做唔到就喺佢身上搵，我真係唔知自己做唔到做 。」現年64歲的他更期望契爺可以推出自傳，分享豁達人生觀、個性善良及極具修養，他突然挑機契爺說：「聽講佢今年年中開演唱會喎，加油呀，我都加油，希望有朝一日破胡繼修（胡楓原名）紀錄，希望我破紀錄時，大家都嚟睇吓我，好冇？」張學友愈戰愈勇。張學友相當親民。胡楓睇得開心。鄺美雲捧場。