朱千雪大讚高海寧係超級好女仔 與老公齊忘白色情人節零慶祝.朱千雪（Tracy）與譚玉瑛今日（15日）以基金大使身份，現身沙田出席香港乳癌基金會「乳愛FUN享社區乳健教育日2026」活動啟動禮。身兼藝人、執業律師、導師、媽媽及太太多重身份的Tracy，被問到如何平衡繁忙工作與家庭生活，她直言現時凡事都會以家庭為先，自從誕下兒子後，更加注重身體健康。

「因為冇健康，做乜嘢都冇用，就算唔係為咗自己，都要為屋企人負上責任。」Tracy透露，自己生完小朋友之後，每年都會堅持做全面身體檢查，做好乳健相關篩查，為家人把關好自己的健康狀況。

談到日常的時間分配，Tracy受訪時表示，自己一星期有4日都會親自陪兒子返學：「我星期一、二、三、五都會有半日陪囝囝上play group，放低佢之後我先會去返工，到夜晚6、7點就會準時放工返屋企，陪佢瞓覺。」她指兒子現時年紀尚小，身邊必須有人照顧，所以會同老公互相遷就、調整工作時間，分工合作照顧小朋友。

Tracy又笑言，兒子現時每日都好早起身：「如果佢好早起咗身，又未夠鐘返學，我就會抱佢去書房陪我工作，仲會俾個壞咗的keyboard佢玩，等佢覺得自己同我一齊做緊嘢，畫面都幾得意。」

提到早前農曆新年期間，佢同「2 Line黨」一班好姊妹湯洛雯、岑杏賢、蔣家旻等，各自帶埋另一半齊齊食飯團拜，當中仲有單身的高海寧（高Ling），被問到可有為好姊妹介紹「筍盤」？Tracy即時大讚：「我大部份朋友都喺晒度喇，但高Ling真係一個超級超級好的女仔，我相信佢一啲都唔難搵男朋友，只係佢暫時未揀啱啫！」

至於昨日（14日）是白色情人節，被問到同老公有什麼慶祝活動，Tracy就笑住坦言，兩公婆居然一齊忘記了呢個節日，所以當日完全冇任何慶祝安排，亦冇互相準備禮物，零表示度過。TVB