正义女神 許紹雄招牌暖心笑容睇到網民眼濕濕 總監製睇一次喊一次

琴日（3 月 16 日）《正義女神》於優酷首播，隨即喺內地掀起熱烈討論同廣泛關注。已故「金牌綠葉」許紹雄嘅演出，觸動咗唔少網民嘅情緒，有網民留言：「睇到 Benz 雄出場，個心都跟住痛埋。」

劇入面，許紹雄飾演裁判法院主任裁判官洪思義，同阿佘飾演一對互相支持、但處事風格截然不同嘅上下屬。無論係法庭入面定係職場上，許紹雄都好似做返自己一樣，時刻保持親切、祥和又善解人意，尤其係佢招牌嘅「暖心笑容」，唔止令網民睇到眼濕濕，仲令「契女」阿佘勾起好多難忘回憶。

阿佘早前仲喺社交網拍片，抒發對「老竇」許紹雄嘅思念：「劇組俾咗頭幾集《正義女神》我睇，我睇嘅時候… 當然有一種好奇怪嘅感覺，就係… 哎呀… 就好似好近，然後就好似佢仲喺度一樣。對我嚟講第一次睇，見到老竇嗰陣感觸特別深，仲諗起好多我哋一齊拍戲嘅開心事，仲有佢平時開玩笑嘅樣子。」

阿佘仲透露，為咗演好呢套劇，難得見到「老竇」努力記對白嘅一面：「因為佢有好大份量嘅台詞，始終佢係一個法官，所以我見到佢好專心、好努力去背台詞嘅一面，呢個係我從來都未見過嘅，我見到一個好唔同嘅老竇。」

至於總監製鍾澍佳，亦透露睇到許紹雄嘅演出係「睇一次喊一次」：「許紹雄老師可以話係睇住我大嘅前輩，幾十年嚟都唔知合作過幾多次。今次我覺得好欣慰，可以搵到佢嚟幫我哋演洪思義呢個角色，因為… 其實我心情好複雜，佢第二集嗰場戲… 就係嗰場要佢講十次我愛你嘅戲，當我哋第一次寫呢場戲嘅時候，我哋諗到要演呢個角色嘅人就係許紹雄老師，嗰陣仲未落實佢會唔會演，所以我自己… 真係每睇一次就喊一次。」

TVB正义女神