自然系女子旅行3｜梁超怡泳照率先流出 火辣預告「浸勻濟州溫泉」

TVB Plus（82台）個王牌旅遊節目《自然系女子旅行》系列，一路以嚟都係行山海路線，話要透過個mon同觀眾嚟一場療癒之旅。之前已經講過會開拍《自然系女子旅行3》，繼續由林映暉（暉哥）孭飛做主持，再配搭3位自家女藝人，一齊殺去花蓮、台東同韓國濟州。當時仲未公布人選，已經引到班網民熱烈討論，個個都喺度估女神拍檔會係邊個。今日謎底終於局部解開，暉哥同新登場嘅主持梁超怡（Joey）已經搶先一步，飛咗去韓國濟州開工。

暉哥接受訪問嗰陣，話好開心個節目可以拍到第三季，仲透露今次有個「私密任務」要執行。佢笑住話：「可以再同大家親親大自然開心之外，最重要係之前睇IU同朴寶劍套韓劇《苦盡柑來遇見你》嗰陣，見到劇入面啲油菜花田靚到呢，今次終於可以近距離睇到。」佢仲話自己向來好鍾意濟州嘅海女文化，今次可以親眼睇到海女潛水採鮑魚，真係好感恩，多謝佢哋為大家提供咁新鮮嘅海產。講到節目傳統，暉哥話今趟都會「秉承」風格，安排泳裝浸溫泉嘅畫面，佢笑住話：「今次我個旅伴係超怡，因為佢好slim，我就偏肉肉哋，搞到我拍溫泉環節嗰陣，企喺佢隔籬都怕醜到爆。」

至於梁超怡，佢都喺IG報咗平安，話自己已經身處濟州，仲透露：「新一輯嚟到濟州啦！今次加埋我陪大家一齊去玩，我帶隊玩咩好……」。佢話除咗可以近距離餵羊同食好嘢之外，最期待就係「浸勻濟州唔同嘅特色溫泉」。睇嚟今次觀眾真係有眼福，可以睇住兩位靚女喺溫泉入面，一邊浸一邊同大家療癒身心。TVB