關嘉敏7日拍完90集短劇！瞓兩個鐘照打 盔甲重到擰轉都難.關嘉敏今日以一身巾幗長公主造型殺入《香港國際影視節》，為佢參演嘅內地短劇《天啊！班主任竟然是武功高強的長公主》造勢，一出場即引來大批粉絲圍觀狂影。

關嘉敏接受訪問時透露，呢個長公主造型相當架勢，頭飾加盔甲成副裝備成五至七磅重：「由朝早化妝都要搞兩三個鐘，件戰衣係好重但型到震，呢個獅頭盔甲真係好勁，拍嘅時候成日要住，仲要揸住武器，雖然辛苦但真係好有型，我好鍾意！」

講到劇中有大量打戲，關嘉敏話每次拍完都周身骨痛：「呢套戲完全滿足到我平時做唔到嘅嘢，即係終於可以試吓打人嘅滋味！但每次拍完打戲都真係好攰好痛，加上成身咁重嘅裝備，打完直頭散晒。」

佢仲爆最難忘係瞓得兩個鐘都要繼續打：「記得有次凌晨一點幾仲拍緊打戲，拍完返屋企卸妝瞓覺，起身又繼續打過，連續幾日都係咁。」

今次係關嘉敏第一次拍內地短劇，成個劇90集，竟然只係用咗7日就搞掂！每日平均瞓得兩三個鐘，成日拍到凌晨，場口又跳得好勁，今日拍第85集，下一場可能跳返去第1集，搞到佢個人又瘦又水腫。

好彩佢本身有功夫底，學過武又玩開拳擊，個樣都「幾打得」。佢話今次做女一兼打女，過程雖然辛苦但好好玩，係一個完美體驗。

呢套《天啊！班主任竟然是武功高強的長公主》短劇，普通話版同廣東話版都已經搞掂，而家已經有唔少外地平台吼住，香港嘅手機同網絡平台都主動接洽想引入。預計未來一個月內會陸續喺各大平台上架，到時仲會配合YouTube等渠道宣傳，誓要短時間內儲爆討論度！TVB