羅家英年底首度與汪明荃合拍TVB新劇.羅家英（家英哥）昨日到啟德酒店出席「粉紅海豚基金」活動，與海洋保護人士一齊呼籲關注瀕危物種。活動開始前，家英哥受訪時透露今年年底將會為TVB拍劇，原來佢係發揮幽默本色，宣布將與汪明荃（阿姐）首次合作拍劇。

家英哥話過往從未同阿姐合作拍劇，今次終於有機會，佢搞笑話兩人可以喺劇中比拼演技。問到劇中同阿姐係咩關係，家英哥話現階段TVB只係預先要求佢哋「度期」參演，劇集題材、角色關係暫時都未知。佢仲搞笑話，希望喺劇中飾演植物人，唔使講對白，躺着就可以收片酬，只要喺大結局最後一幕醒返就得。

家英哥透露下月將會去新加坡演出粵劇，五月則會喺香港為80周年慶典演出。問到今年會唔會再抽時間同太太去旅行，佢就話：「有嘅，啱啱先商量緊去邊。（你想去邊？）好多地方去嘅，譬如我去新加坡做戲，佢會跟埋過嚟做阿四。（家英哥好曳喎）我做咗咁耐阿四，到佢做返啦，同埋佢細佬結婚40周年我哋會去探佢。」

講到佢早前為林明禎同馬來西亞歌手合唱嘅賀年歌曲出演MV，家英哥話並非由林明禎或其緋聞男友呂爵安（Edan）邀請，而係由馬來西亞方面邀請，佢亦係去到拍攝現場先知林明禎在場。問到新年期間Edan有冇帶林明禎向佢哋拜年，羅家英話：「冇啊，帶咗兩個男人。（佢拍拖都唔同你講？）佢都冇話畀我聽，我點知啊，我後來先知呢樣嘢，因為我喺地鐵站望上去先知有啲風雲喎，到我真係見到佢，我都唔認得。」

佢續指喺兩人初相識到台灣拍攝旅遊節目時，Edan已經成日口花花：「呢個又我嘅心上人，呢個又我迷戀嘅。（佢青出於藍）我喺佢呢個年紀嗰陣做緊大戲，好似隻木蝨咁，匿埋最厲害。」佢話有睇Edan演出嘅《金多寶》，大讚佢演得「好抵死」。

對於汪明荃農曆年間喺社交平台分享影片時，雙手出現顫抖情況，引發網友關注阿姐嘅健康，家英哥話未有察覺阿姐有手震，「其實佢應該冇咩事，佢手震係咪做戲畀你哋睇？」佢話冇見到，但強調阿姐健康狀況冇問題。再被問到佢本身有冇手震？家英哥笑住話：「我而家咪震緊囉，我而家連把聲都震埋，唔好問，我怕講多錯多。」TVB