《臥底嬌娃》邵美琪拆穿關禮傑大話痛心演繹淚流滿面 姚嘉妮睡衣Look震撼網民.熱播中嘅《臥底嬌娃》，今晚（20日）一集邵美琪再次大晒演技，對關禮傑嘅背叛痛心演繹，盡顯功架。劇情講到邦妮（邵美琪飾）當場拆穿劉彪（關禮傑飾）嘅大話，當佢拎出劉彪同麗荃（姚嘉妮飾）偷情嘅相片後，劉彪即時「變臉」表示「我知我做錯嘢，冇藉口」。佢自言要「維護呢頭家」、「你同寶儀同我生活咗咁耐，我真係唔想冇咗你哋」。面對佢嘅誠心懺悔，邦妮由冷靜慢慢變得愈來愈激動，眼睛通紅痛心表示「年哥話我係四聯嘅公主，唔應該咁委屈。」劉彪再對佢承諾「我保證唔會再見呢個女人，以後一定會好好對你同寶儀」，邦妮淚流滿面話：「我啱啱查到你仲有個仔，不過係喺我哋未結婚之前有」、「你諗住呃我一世？」

呢場邵美琪拆穿關禮傑大話嘅戲，唔少觀眾大讚相當精彩，特別係邵美琪層遞式嘅情緒轉換，面對老公坦白出軌時嘅痛心難過演繹，演技張力十足，令人睇到心痛，紛紛留言「睇到我都喊埋一份」、「兩個都好好戲」、「劉彪真係衰男人」。

同一集入面，麗荃（姚嘉妮飾）同劉彪嘅親密戲亦成為網民焦點。劇情講到麗荃突然被邦妮（邵美琪飾）解僱，邦妮話：「因為你私吞咗啲客送畀我嘅超市禮券」、「你理得我去唔去，呢個唔係你隨便偷我嘅嘢嘅籍口」，並要麗荃即刻執嘢走人，擺明唔想佢同自己老公繼續糾纏。鏡頭一轉，麗荃除低睡袍大晒吊帶睡衣，同劉彪上演床戲，之後仲向佢訴苦俾邦妮突然解僱一事。呢場親密戲，姚嘉妮將美好身段表露無遺，養眼到爆！難怪唔少觀眾大讚47歲嘅姚嘉妮凍齡有術，身形超Fit，女人味十足，令人羨慕，留言「嘉嘉會唔會keep得太好」、「嘉嘉完全唔似就嚟50歲」。

關禮傑接受訪問時話同姚嘉妮相識多年，大家亦係好朋友，「我哋以前都合作過好多次，又做過情侶，所以拍呢啲親密戲，我哋唔覺得尷尬，同埋大家演戲咁耐都好熟悉對方嘅做法，拍起上嚟都好順利，亦唔會覺得佔對方便宜嘅感覺。」