臥底嬌娃丨陳瀅電單車追捕毒犯型到爆 「一字馬+過肩摔」一氣呵成.《臥底嬌娃》昨晚（20日）劇情進入大快人心嘅關鍵時刻，警方經過精密部署，成功將正在進行毒品交易嘅劉彪（關禮傑飾）與察猜（何啟南飾）人贓並獲，兩人同一眾手下最終法網難逃，全部被捕。

全晚最令觀眾熱血沸騰嘅一幕，莫過於江妙姿（陳瀅飾）展現出嘅超強戰鬥力。戲中妙姿騎住電單車英姿颯爽出場，仲上演邊開車邊精準射擊目標車輛輪胎嘅高難度動作。當疑犯車輛失控撞毀引發爆炸後，妙姿型到爆咁停下電單車，一個轉身除低頭盔，隨即衝向兩名持刀疑犯展開埋身肉搏。

面對危急關頭，妙姿仲將手上嘅頭盔化成武器，接連使出「一字馬」同「過肩摔」兩大招式，型格十足，瞬間將兩名疑犯制服，身手了得，動作一氣呵成。

呢場打戲隨即引發網民熱烈討論，唔少人對妙姿嘅形象轉變感到驚喜，紛紛留言：「陳瀅有做打女潛質」、「果然係化悲憤為力量，戰鬥力爆晒燈」、「陳瀅今次啲動作戲真係好型，完全唔錫身。」TVB