【On.cc】薛之謙演出中途突宣布全額退票　願補償機票酒店錢

內地歌手薛之謙尋日（29日）於廣州舉辦《萬獸之王》巡演，因暴雨導致舞台設施損壞，舞台燈光、LED、螢光棒等皆出問題，導致演出效果未達預期，薛之謙中場時，不僅向觀眾道歉，甚至霸氣宣布門票全退，且補償遠道而來嘅粉絲機票加酒店錢，負起全責嘅誠意，獲全網讚爆：「會火（紅）不是沒原因。」

薛之謙唱到中場，忽然宣布門票全退。

薛之謙接受唔到舞台燈光、LED、螢光棒全部問題。

薛之謙演出中途察覺舞台呈現因暴雨不如預期，令佢愈唱愈急，覺得說服唔到自己，佢表示：「如果我早一步知道訊息、這麼多東西是壞的，我今天一定不會堅持演出的。」並直白表示效果唔好就係唔好，冇辦法當作冇事而繼續唱，覺得粉絲花冤枉錢。佢誠懇表示：「雖然這是天災，很大的雨，但我覺得畢竟我是有責任的。」霸氣表示門票全退，且遠道而來嘅粉絲交通費與住宿費用憑證賠償，若有粉絲唔願意退票，喺下次佢巡演到廣州時，可憑今次票根入場免費睇，並二度向粉絲慎重道歉。於宣布補償方式後，薛之謙仍敬業將下半場演出完成，高呼粉絲係家人、相聚係約會，獲得全網一片好評，直讚佢係「演出者的表率」。

薛之謙為此決定補償門票、機票、酒店錢。

二度向粉絲慎重道歉。

網友大讚佢係「演出者的表率」。