波斯尼亞前鋒廸施高喺記者會表示，喺現場奏起意大利國歌時，所有波斯尼亞人應該起立同鼓掌，因為意大利係喺波斯尼亞戰爭結束（1995年年尾）之後，最早嚟到（1996年11月）波斯尼亞踢友誼賽嘅國家，佢哋對此心存感激，然後90分鐘嘅比賽當然係一場戰鬥。

今季上半季效力費倫天拿嘅佢表示，舊年喺費倫天拿主場對AC米蘭嘅時候，見到加圖素同對方講希望彼此能夠喺波斯尼亞相遇，呢位現任意大利教頭當時回答話佢都希望係咁。然後而家真係見面，一場對兩個國家都非常重要嘅比賽，賽前賽後大家都會互相尊重。

呢位40歲前鋒表示佢熱愛意大利足球，喺當地生活接近9年，亦都係一段美好嘅時光。現時呢支意大利缺少托迪、迪比亞路，但實力都唔錯，當然以往嘅意大利國家隊係另一番景象。佢會形容德國同意大利足球截然不同，德國足球着重比賽強度，呢樣正係意大利足球缺乏嘅，或者亦都因為咁佢哋成績有欠理想，佢會期待今場係一場戰術性好強嘅賽事。

今晚一對上半季喺費倫天拿做隊友嘅前鋒迪施高同摩西堅恩好大可能同場較量，兩位喺做隊友嘅時候合拍程度一般。廸施高亦喺早前嘅訪問提到， 12月費倫天拿對帕爾馬時，球隊下半場早段落後，但係到最後階段教練仍然冇揀佢落場，寧願選擇後衛換後衛，都冇起用佢，係佢決定離開費倫天拿嘅導火線。