周嘉洛被問社交帳號管理即扮「瞌眼瞓」吳業坤約滿TMG在即未傾續約

藝人江美儀、周嘉洛、朱敏瀚及吳業坤日前現身將軍澳電視城，出席新節目《試真D》記者會。眾人以神秘顧客身份走訪內地人氣餐廳及景點，親身「試伏」，大開眼界。

江美儀、周嘉洛與朱敏瀚受訪時透露，拍攝期間的食肆全是自發探店，沒有事先安排。他們除了測試食物質素，還體驗店舖服務態度，試過被出名惡劣的店員以粗口「問候」，亦曾遇過即使被認出明星身份，仍被搶手機要求點讚。美儀說：「有次去食燒蠔，隻蠔燒完仲係生嘅，仲會郁。第一次出門口大家即刻食藥打底，個肚都係唔舒服，囉囉攣。」她又笑言，嘉洛與朱敏瀚因健身每日要額外食8隻雞蛋：「朱敏瀚仲成隻雞咁食，所以我每日都要幫佢食雞。」

朱敏瀚則指，原本以為拍飲食節目會增磅，結果旅程後反而瘦了。最誇張的是去到梅州一個明朝建造的公眾溫泉：「個池好污糟，有尿味，池底全部係青苔。我哋冇浸身，只係浸腳，浸完好想斬咗對腳。」

講到無綫有意「統一管理」藝人社交網帳號引發私隱疑慮，在劇集《正義女神》飾演法官的周嘉洛回應時，搞笑地合上眼說：「有聽過，但冇人搵我，等公司回應好啲，公司好似出過聲明。（如果實行，擔心冇私隱？）呢啲真係要睇真啲，都係講返《試真D》。」問到朱敏瀚公司有否聯絡他，他笑說：「冇人問我攞account，如果有，咁就要問吓張振朗。（話張振朗企硬唔交出被雪藏？）我同佢唔係好熟，哈哈。（會唔會被公司雪藏？）佢有做緊嘢㗎，一定冇畀人雪，佢有拍緊嘢，同公司籃球隊喺內地打比賽。」嘉洛也笑稱與振朗不熟，更說：「我都同佢唔係好熟，要諗吓講緊邊個。」

《試真D》播出後，嘉洛同時有《愛·回家之開心速遞》和《正義女神》出街，幾乎霸佔整晚時段。他坦言演員很被動，希望觀眾不會看厭，又透露暫時未有新劇安排，會專心拍攝《愛·回家》。而朱敏瀚則透露預計4、5月開拍新劇，但詳情要保密。

同场嘅吳業坤被指約滿TMG唱片公司、名字一度在官網消失，他表示本月24日仍會以TMG歌手身份出席港台頒獎禮領獎，現階段仍然是TMG歌手。問到是否已傾續約，他說：「真心未傾，差唔多時間約滿，係今年嘅事。（續約機會高唔高？）留低又好，做獨立歌手又好，希望做到自己鍾意嘅嘢。（傳資源俾晒《中年好聲音》令你想離開？）資源嚟講，我覺得自己都算數三數四，又去過日本、台灣拍MV，公司待我不薄。當然師兄弟妹愈嚟愈多，派歌去電台有quota，呢個方針要研究吓，係好現實嘅問題。」他又透露，傳出離開TMG後，雖然未有其他公司接洽，但反而有不少工作洽談合作。即將生日的他預告會撇低老婆，到深圳舉行生日音樂會。對於再傳太太有喜，他否認，指已經傳過3、4次，笑言從未努力「造人」，生小朋友會隨緣。TVB