《正義女神》收視封王！周嘉洛盛讚佘詩曼神級演技 蔣祖曼直言佢自带香氣.藝人譚耀文、周嘉洛、蔣祖曼、馬貫東、黃庭峰、丘梓謙及樂珈嘉等今日（11日）現身觀塘，為熱播劇《正義女神》宣傳，眾人仿效劇中「花生醬三文治」經典場口大玩遊戲，嘉洛與梓謙徇眾要求試食疑似「加料」三文治，吸引大批粉絲到場撐場。主角佘詩曼與陳煒雖因工作未能出席，但特意拍片預祝總監製鍾澍佳13日60歲生日，大會亦準備蛋糕及一眾演員的簽名「閃咭」為他慶生，台上更宣布《正》劇首集跨平台總收視錄得23.2點，約149萬觀眾捧場，暫列2026年翡翠台劇集收視之冠。

劇中飾演父女的譚耀文與樂珈嘉一同受訪，阿譚大讚珈嘉演出出色：「喊包嚟，要幾多有幾多！畀到真係好囡囡、Sweet同嗲，好自然流露。」問到珈嘉面對譚耀文與佘詩曼兩位前輩會否有壓力，她直言沒有：「因為兩位前輩好Nice，試造型時已主動傾偈，Add我contact約食飯，所以完全無壓力。」阿譚表示希望後輩能放鬆發揮最佳狀態，笑指自己初入行時好緊張，遇上嚴肅前輩會更怯場，故現在會盡量讓後輩感到舒服，但亦坦言嚴肅未必是壞事，更憶述當年與曾江合作，對方不帶劇本仍能讀出九成九對白，啟發自己演出前必背熟對白，片場拿劇本僅為對稿以示尊重，他笑謂：「嚴肅其實係好嘅，但我原則要睇對咩人，譬如對個女唔會嚴肅，對男仔就會，我對自己個仔都係㗎，男仔要謹慎啲，條橡筋要拉緊啲，一鬆就鬆散，哈哈！」珈嘉則稱與阿譚合作好神奇：「佢每個Take都唔一樣，教識我要用心聽，每一場都要留意發生咩事。」阿譚亦認為，將對白生活化比死讀對白更出色。

有网民热议佘詩曼自带體香，問到與阿佘有擁抱戲的珈嘉有否留意，她笑言：「媽咪梗係香啦，但我唔會特登去聞佢。」指香味是自然飄出，而且每次都是同一種；阿譚則大爆拍攝「挨膊頭」戲時有聞到，笑稱自己不是女生，分不清是花香還是香水，估計是香水味，又指相隔20多年再與阿佘合作，覺得對方成熟多了一份豪情，會為人抱不平、關心身邊人，而且活力滿滿，笑謂：「佢唔會攰，你對住佢點敢講攰。」

至於早前官方片段中，大爆阿佘開工收工判若兩人、直言對方「癲㗎」「精神分裂」的蔣祖曼與周嘉洛，受訪時笑稱這是讚揚，皆因阿佘演技收放自如太厲害。嘉洛說：「阿佘呢啲神級演員，好難用一般字眼形容，佢好全面，可以Cover到唔同狀態，『精神分裂』係褒義嚟㗎！」蔣祖曼亦笑指阿佘曾親口承認：「我哋問過佢點樣演繹咁多唔同角色，佢話每一個都係佢自己嚟。」談到粉絲指阿佘自帶香氣，蔣祖曼直言真係有聞到，覺得是香水加自身體香；嘉洛則笑夸該粉絲嗅覺靈敏，自爆曾掂過阿佘用過的筆，卻冇發現留香，又坦言自己好在意人哋有冇口氣：「但阿佘從來冇……令我失望過，口氣好清新！（拍Kiss戲遇到對方口臭點算？）冇問題㗎，我哋好專業，情緒啱咗就Kiss，演員嚟㗎嘛！」

另外談到早前與陳煒一齊做普拉提，蔣祖曼大讚對方好優秀：「我辛苦到想嗌出嚟，佢依然保持微笑，完全冇流露半點辛苦，連導師都讚佢有潛質！」更笑謂一開始得自己同陳煒一齊做，自己唔敢嗌辛苦：「我覺得佢連打乞嗤都係冇聲嘅，哈哈！」曾一齊上過一課的嘉洛亦打趣道：「直頭感受唔到陳煒喺度。」

TVB