白色小背心搶鏡！蔡思貝西九「零濾鏡」被捕獲.視后蔡思貝早前正式宣布離開無綫電視，結束13年賓主關係，全面回復自由身。近日佢現身西九文化區戶外活動，被網民「野生捕獲」，當日佢著上喱士邊白色小背心，配中分長波浪捲髮，打扮簡約清爽又不失女人味，身材曲線非常吸睛。最令人驚嘆嘅係，喺完全冇濾鏡同修圖嘅情況下，蔡思貝嘅皮膚依然細緻緊緻，狀態極佳。上載相片嘅網民大讚「真人好靚」，引來大批留言附和：「貝貝真係越來越靚」、「完全係顏值巔峰」、「比以前更有氣質」。同時亦有聲音感嘆佢近年幕前作品減少，直言「好想再睇佢拍劇」。

蔡思貝離開TVB後，工作時間由自己掌握。近日佢已起程前往尼泊爾進行慈善探訪，深入了解當地女童面對嘅艱苦生活。從機場出發時，蔡思貝以輕便舒適裝束示人，不經意露出小蠻腰，仲喺社交網興奮寫道：「尼泊爾，我嚟啦。好期待可以透過今次嘅旅程，親身了解當地女童所面對嘅挑戰，同埋見證如何幫助佢哋改善生活，返嚟再同大家分享旅程點滴。」