专访丨周嘉洛搣「廢青」形象收起笑容扮嚴肅 恨轉戲路演奸角挑戰舞台劇.無綫小生周嘉洛「跳出」處境劇《愛．回家之開心速遞》，與佘詩曼、陳煒、譚耀文等前輩合作拍攝劇集《正義女神》，當中飾演最年輕法官「鄭邵文」嘅嘉洛，一改以往搞笑戲路，以全新形象驚艷觀眾。佢日前接受東網訪問時透露，演繹角色時特意保持嚴肅神情並減少笑容，希望為觀眾帶嚟新鮮感。

多年嚟，周嘉洛喺《愛．回家》中飾演金城安「廢青安」，形象深入民心，招牌式嬉皮笑臉令大眾對佢定型，佢話：「好多人被金城安侵蝕咗，誤以為個角色就係我。」佢形容現實中嘅自己處事更接近「鄭邵文」嘅理性冷靜，只有面對好友同粉絲時先會展現「金城安」嘅活潑開朗。為此，佢表示短期內唔想再演喜劇，渴望挑戰高智商奸角等有深度嘅角色，讓觀眾見到佢嘅多面性。

劇中佢同前輩們有唔少對手戲，感激佢哋幫自己投入角色，亦從中學到好多。佢大讚阿佘演戲功力超勁：「佢所有嘢都恰到好處，會覺得呢個人好勁，唔怪得套套劇都咁好睇。」對於譚耀文，佢就以「周伯通」嚟形容，大讚對方表演靈動、不落俗套，一入戲就能隨情緒自然流露，毫無設計痕迹。至於已故嘅許紹雄就令佢學識要保持放鬆從容嘅心態，先能更自在地應對複雜戲份。

面對影視環境轉變，周嘉洛抱持開放態度，對於內地興起嘅短劇熱潮，佢直言只要劇本出色就唔會抗拒，又透露自己嘅「人生清單」其中一項係挑戰舞台劇：「如果有一日可以企喺舞台上面，自己一個演晒，好型喎！」至於歌藝，佢自認唔太識用聲，希望將來搵機會進修，提升演唱實力。

感情方面，嘉洛同陳瀅因合作《痞子殿下》私交甚篤而多次傳出緋聞，不過嘉洛早前突然劃清界線，指兩人好少見面。目前單身嘅佢抱持隨緣態度，坦言感情嚟到唔會抗拒，理想嘅另一半要同佢三觀契合、生活模式相近，即使將來戀愛都會保持低調保護私隱。TVB