中年好聲音4｜周志康馬浩宜「攬啜」跳唱《Chotto等等》震撼全場 自爆差啲被老婆扭甩耳仔

《中年好聲音4》今個星期日（3日）播出《快慢二重奏》雙人組隊比賽下半場，20強挑戰經典快歌，鬥歌藝之餘仲鬥舞技。今集最大必睇位，一定係周志康同馬浩宜合唱《Chotto等等》嘅大膽演出！志康話覺得首歌有欲拒還迎、互相吸引嘅意思，所以同浩宜設計舞蹈時加入性感元素，仲笑言唔好浪費浩宜嘅逆天長腿。兩個各有家室嘅人喺台上大跳辣身舞，攬住拗腰、幾乎面貼面、共用一支咪唱歌，仲有借位咀嘴，全場睇到嘩嘩聲，佢哋嘅另一半都坐喺觀眾席上大叫！唱完之後，志康笑話前一晚差啲被老婆扭甩耳仔，浩宜就自爆一開始綵排係「嫌棄」志康，惟有晚晚逼自己講「周志康好靚仔」嚟催眠自己，笑爆全場。

另外，許美琪同鄭家聲著紅黑皮褸Rock爆合唱《紅色跑車》，台風十足，中間一段舞步非常搶鏡。出名舞功高強嘅家聲大晒驚人腰力，跪低向後拗腰再彈起身，最後更High到除外套晒麒麟臂，引爆全場歡呼。美琪透露自己唔識跳舞，全靠家聲教導有方，家聲話美琪只需配合佢，由佢負責所有難跳嘅舞步。海兒大讚兩人演出有驚喜，指美琪動作做得好，學習能力強，又建議家聲多唱跳唱歌，絕對係加分位。張佳添就話如果有進步獎，一定要頒畀家聲，因為佢聲色藝都有進步。TVB 今集20強全員鬥舞，完整歌單如下：范子睿/尹景順唱《頭髮亂了》vs蔡宓婕/吳亦偉唱《煞科》；姚兵/黎若雪唱《愛情陷阱》vs尤淑情/卓猷燕唱《Are You Ready》；戴藝/鄭仲豪唱《我最搖擺》vs鄭家聲/許美琪唱《紅色跑車》；陳旭培/可嵐唱《重口味》vs周志康/馬浩宜唱《Chotto等等》；莫家淦/雷小雷唱《找自己》vs科亞高巴/許雲妮唱《活著Viva》。