4屆視后佘詩曼（阿佘）與陳煒昨日現身劇集大結局活動，陳煒向她大派高帽，直言沒有對方，就不會有如此精彩演出，阿佘更令她要使出十成功力來應付，對此阿佘亦謙稱：「咁我都需要好對手嘅！」二人可謂惺惺相惜！

無綫劇集《正義女神》昨晚大結局，總監製鍾澍佳率領台前幕後包括阿佘、陳煒、譚耀文、周嘉洛、馬貫東、蔣祖曼、劉倬昕、黃庭鋒、陳若思及倪嘉雯等總動員現身商場觀看結局，場內坐了近400名嘉賓，場外及其他樓層則站滿數百粉絲，當中以阿佘的粉絲最人多勢眾，場面墟冚。

陳煒以綠色晚裝現身，略見性感，她指服裝由老公為她挑選。提到本報早前獨家披露《正》劇快將開拍前傳《模範律師團》，並由她擔任女主角，她坦言拍攝正劇時已知鍾澍佳有此構思，對於有機會跟視帝羅嘉良合作，她開心地說：「我都好期待，拍佳導嘅劇最幸運係可以同好多前輩合作，好似今次同阿佘合作，因為係阿佘，所以有啲場口先可以咬得咁緊，否則好多法庭戲未必有咁好效果。（阿佘唔會演前傳，覺得美中不足？）據我所知故事係講《正義女神》之前10年嘅故事，係講律師為主，阿佘係法官，所以冇佢。（希望佢客串？）咁益佢？梗係最難先畀佢做。（《正》劇會唔會有續集？）聽佳導講好似考慮緊，睇阿佘。（怕唔怕你冇份？）可能未必用律師身份出現。」

而陳煒早前在專訪中同樣對阿佘這位對手讚不絕口，笑指對方逼得她要施展渾身解數，使出十成功力迎戰：「今次真係遇到好強嘅對手，要將自己啲嘢逼晒出嚟，唔可以做得差，因為所有人都做得好好。」她直指角色是近年最大挑戰，事前花了很多時間理解案情和熟讀劇本：「法庭戲真係好難，有好多專業用語，所以對白要滾瓜爛熟先可以拋到書包，做到個氣勢出嚟。」

至於阿佘被網民稱讚演技升級，連眼眉毛都有戲，阿佘謙稱：「今次使命希望做到同Man姐（《新聞女王》角色）唔同，冇Man姐影子，自己已經好滿意，算有交代。（陳煒話你逼佢使出十成功力？）又唔可以咁講，我都好需要好對手，火花都係咁擦出嚟！」談到將開拍的前傳，阿佘直認自己冇份，問到會否感可惜？她說：「仲有好多強勁班底。（你有冇機會喺前傳嘅彩蛋出現？）唔知呢？」雖然無緣拍前傳，但問到可會拍續集時？她認為最重要是劇本，不想為拍而拍。另外，阿佘在社交網晒出手臂曬傷照片，她解釋因日前到馬來西亞工作，烈日當空下曬足兩小時，笑說：「真係畀當地粉絲錫到燶晒！」

另外，鍾澍佳談到前傳時，坦言羅嘉良已答允演出：「傾得差唔多，我同佢係北京鄰居，佢應承咗。（前傳會唔會有阿佘客串？）未必有佢。」他透露今年1月已開始構思劇本，現時寫得差不多，寄望5月能開拍，至於會否開拍續集，他叫大家給他時間：「我要搜集資料，依家啲觀眾好貪心，唔容易招呼，要畀時間準備。」提到《正》劇閃卡搶購一空，他稱會出番外閃卡，並開玩笑指會加入阿佘的泳衣照。