陳凱琳化身童話公主回港吸金 《浪姐7》二公排名持續尾二 .藝人陳凱琳（Grace）近期忙於在內地拍攝綜藝節目《乘風2026》（《浪姐7》），但未有放下香港嘅工作，昨日（1日）仍然抽空返港，出席自己朱古力品牌嘅宣傳活動。Grace以一襲黃色低胸連身裙配麻花辮子亮相，造型十足童話公主，現場獲大批粉絲撐場，有人更送上印有「乘風順利」嘅應援扇子為佢打氣。藝人郭柏妍、關嘉敏及鍾柔美亦有到場支持，網民大讚真人好靚，完全唔似三子之母。

除咗出席活動，Grace亦積極經營社交網，近日上載多條美食短片，包括拍攝《浪姐7》時喺長沙夜市搵食、韓國品牌傳統街頭小食，以及在港歎法式美食，網民都驚嘆佢精力無限，仲羨慕佢食極唔肥。

另外，《浪姐7》昨日公布第二次公演嘅官方排名，台灣女星曾沛慈與李心潔分別排第5位及第8位，陳凱琳排尾二，排名持續低下。由於曾沛慈所屬團隊喺二公中獲得最高分，而佢本人人氣一直是斷層第一，但卻連續在一公同二公嘅個人排名中都係第5，引起網民質疑比賽公平性，網上更發起「浪姐 做票」嘅熱搜。此外，節目組邀請咗曾被其中一名浪姐李小冉起訴名譽侵權嘅博主擔任二公舞台評審，引起李小冉粉絲不滿及投訴，最後節目組表示該博主唔會再參與之後嘅錄製。