愛回家｜呂慧儀力挺風少唔係少爺仔：一齊食茶餐廳捱更抵夜 否認踢走CP傳聞. TVB處境劇《愛．回家之開心速遞》即將停拍，演員們紛紛表達不捨。呂慧儀昨日（16日）喺中山出席音樂會時接受《香港01》訪問，直言好唔捨得一班「屋企人」。對於早前滕麗名自爆唔會參演新處境劇，呂慧儀就笑話：「佢話應該啫，唔一定嘅！」佢自己就希望可以試吓「得意」角色，例如糟質人哋嗰種。

呂慧儀入行超過一半時間都喺《愛．回家》劇組，同演員由同事變家人，感情深厚。對於有網民指陳浚霆（風少）係「幕後黑手」，為咗捧紅「神風CP」而踢走受歡迎嘅「Candy Mike CP」，呂慧儀即刻力挺拍檔：「我覺得大家想像力幾豐富，以我認識嘅風少，佢係一個乖同好勤力工作嘅人。雖然大家覺得佢係富裕階層，感覺唔憂做，但其實佢好勤力、好珍惜工作機會。可能嗰啲人唔認識佢，或者接觸唔到真實嘅佢，先會有咁嘅想法。」

呂慧儀又話，公司唔會養閒人，演員出出入入好正常：「Candy Mike佢哋兩個𠵱家喺戀綜Hit到爆炸，可能大結局佢哋會返嚟呢！」對於陳浚霆被指係「少爺仔」，呂慧儀就話佢好貼地：「佢同我哋一齊食茶餐廳、一起捱更抵夜，初期拍《愛回家》追存貨，日以繼夜夜以繼日，佢都同我哋一齊捱。如果真係少爺仔，就唔會咁樣捱啦。」TVB