專訪丨陳庭欣豁達接受情變：我哋絕對唔係敵人.港姐冠軍陳庭欣（Toby）早前與商人楊振源結束8年情，更由九肚山三千呎愛巢搬到黃大仙五百呎舊居。雖然被外界形容為「豪門夢碎」，但Toby不但未有意志消沉，反而狀態更勝從前。她坦言自己並非為了嫁入豪門而談戀愛，分手後即使要搬離豪宅、由闊太生活回歸平民格調，依然保持着一貫的瀟灑同積極，更公開強調同前度「絕對唔係敵人」，分手後仍然有溝通。

Toby早前在接受專訪時提到，她與楊振源嘅八年情之所以畫上句號，其實係源於大家想法同三觀上出現根本性差異，分手絕對唔涉及第三者。Toby坦言這一段感情令她成長好多，令她明白到過去八年為對方考慮得太多，忽略了真正想做的事，如今終於能夠將時間還給自己：「兩個人相處唔應該覺得有壓力，但起碼唔可以放飛自我，要尊重對方嘅感受。」

當提到最不捨得嘅時刻，Toby一度哽咽，話講俾父母知決定嘅一刻最艱難：「因為唔想同屋企人分享唔開心嘅嘢，同佢哋講真係有啲難，唔想佢哋擔心嘛。」她透露父親思想比較傳統，曾經叫佢搞掂段關係、唔好搞成咁，但佢就認為時代唔同咗，上一代為咗子女可能啞忍，但現今世代唔會咁樣委屈自己。

講到分手後嘅新生活，Toby笑言最近忙於拍新劇《警是個大佬》，劇中要打拳又有槍戰戲份，造型仲要露腰，所以keep fit都嚟唔切。對於外界關心佢幾時有拖拍，佢大方回應負責做「金牌媒人」嘅好友林盛斌（Bob），的確有介紹過「筍盤」俾佢，但Toby就話現階段專注工作，要等到6月拍完劇先有時間：「佢會不停sell我，我話工作好忙無時間，佢就會講幾忙都要食飯，但真係好忙。唔好心急，等6月完成晒所有戲份先啦！」

至於被指與《東張西望》小鮮肉曾錦燊過從甚密，Toby就大笑話兩人只係住得近同埋啱傾先熟絡，仲笑言有時收廠會叫對方順便車佢返屋企。她強調自己揀對象一啲都唔急，但就開出一個明確條件——「我係鍾意大過我嘅」。

回復單身後嘅Toby容光煥發，她歸功於近期沉迷嘅新運動匹克球，話打波令佢識咗好多新朋友，仲打埋比賽，可以話係近年最佳狀態：「朋友話我唔同咗，可能冇咗啲無形壓力啦！」至於未來會唔會搵人同居減少失落感，Toby話自己適應力好強，加上屋企有小動物陪伴，仲有個成日搞笑的工人姐姐，已經好充實。

Toby坦言剛分手嗰段時間，夜深人靜聽歌時難免會觸景傷情，但她話人生有失都有得，現時非常享受能夠全情投入工作嘅節奏，對於再踏出一步拍拖，就唯有「歎慢板」先。TVB