《警是個大佬》探班丨羅子溢獻身做「人肉墊」 王敏奕冧讚：100分！. 羅子溢、王敏奕、容天佑同張馳豪等，日前喺黃大仙為無綫新劇《警是個大佬》拍攝外景。場口講述容天佑險遭惡漢擄走，張馳豪等人及時趕到營救。劇情轉變下，王敏奕以霸氣「大家姐」形象現身拯救弟弟容天佑，佢話：「要攞啲氣勢、勇氣出嚟，要壓住個場，一嘗『大佬』滋味！」子溢笑言整部劇都喺佢身邊做「保鏢」。

敏奕激讚子溢拍攝時相當保護女演員：「尋日拍爆炸戲，佢攬住我飛出車，用自己個身落地先，唔使我撻落去，真係好Gentleman，100分嘅對手！」子溢笑言拍檔太誇獎：「應該好多男人都想咁做。」兩人互笠高帽，子溢指相識20幾年嘅敏奕愈來愈有女人味。問到劇中要抱起對方可感吃力？佢話：「唔會，佢輕飄飄。」敏奕話發現子溢原來相當搞笑，私下無聊到連膠紙都可以玩一餐，子溢笑言：「好彩我啲小朋友冇學到我啲無聊嘢。」

至於剛升呢做爸爸嘅容天佑落力演出，以口腫面青、傷痕纍纍嘅造型開工。佢透露劇中飾演性格躁狂、癲癲喪喪嘅反派，角色有發揮，飾演其父嘅Bob大讚佢嘅演出會令人眼前一亮。TVB