丁子朗拜三次姻緣石未見效先變笑話：拍拍吓唔見我喺舊石後面拜緊. 藝人丁子朗近日忙於為新劇《香港探秘地圖》宣傳，日前出席活動時分享拍攝點滴。佢喺劇中飾演滿腔熱誠嘅青年導演「高文彬」，為咗尋找亡母蹤跡，不惜同「神棍」道士黎耀祥一齊闖鬼屋、搞「亡魂」探險。雖然題材靈異驚悚，但丁子朗話劇本其實包裹住一份沉甸甸嘅母子情，讀劇本時一度感觸落淚。

講到外景拍攝，丁子朗透露劇組曾到灣仔著名嘅姻緣石取景。佢哋喺半山腰行咗20分鐘山路先到達，適逢當日落雨，一班男丁仲要幫手搬器材，過程相當艱辛。既然嚟到神靈之地，丁子朗笑言抱住「見到姻緣石，冇理由唔拜下㗎嘛」嘅心態，喺空檔時間借咗公司嘅香火，對住姻緣石虔誠地拜咗三次。佢幽默揭開背後目的：「第一次拜係人緣，希望啲人會鍾意我哋套劇同角色；第二次係姻緣；第三次就係事業。」不過被問到係咪靈驗，佢笑言可能自己唔夠虔誠，暫時未見效，但就已經成為大家嘅笑話：「拍拍吓唔見咗我，原來我喺舊石後面拜緊。」

丁子朗日前喺內地參與音樂會，剛完成舞台表演嘅佢心情大靚，話好享受同觀眾近距離互動，令佢回想起男團訓練時嘅情況。雖然𠵱家工作重心回歸演戲，但佢表示唔會放棄唱歌跳舞。除咗唱跳，丁子朗被現場主持人激讚普通話好標準，原來佢係有下過苦功嘅。丁子朗回憶3年前參加《亞洲超星團》時嘅普通話，令佢大受打擊：「我唔敢相信當時我嘅普通話咁差！嗰陣時以為自己都OK正常，𠵱家睇返，點解嗰陣時咁嘅音都講得出㗎？」佢笑言連簡單日常對話都講得詞不達意，𠵱家回頭睇反而覺得係一個好好嘅成長印記。

為咗喺戲劇上有更好發展，丁子朗𠵱家特登聘請專業老師學台詞對白：「大佬，我上普通話堂好貴㗎個老師！我搵咗個真係教台詞嘅普通話老師，佢唔係淨係教我普通話，係教我點樣讀唔同嘅台詞。我覺得如果我想拍多啲唔同嘅戲，一定要工欲善其事，必先利其器。」佢希望為未來演藝路打好根基。TVB