羅家英大爆汪明荃豪宅30年三度遭爆竊失600萬珠寶：越偷越旺. 羅家英今日（18日）現身米雪嘅《友你有米55派對騷》加場記者會，期間大爆太太汪明荃（阿姐）嘅豪宅過去30年三度被賊人爆竊，損失珠寶首飾總值高達600萬港元。家英哥仲笑言：「我覺得越偷越旺，過眼煙雲嘅嘢唔需要介意。」

家英哥話，阿姐嘅豪宅分別喺三個唔同時間被賊人潛入，每次都係趁阿姐唔喺屋企嘅時候落手，尤其係臨近《東華》或者《台慶》呢啲大型活動前，阿姐會拎啲靚首飾出嚟戴，賊人可能就係睇準呢個時機行動。家英哥透露：「嗰啲賊好叻㗎，通常係工人放狗嗰15分鐘就入咗去。」問到會唔會係工人裏應外合，家英哥話唔敢講，但就話唔想懷疑工人。

雖然損失慘重，但家英哥表現得相當豁達：「而家我哋精咗啦，貴重嘢唔會再擺喺屋企，仲裝晒好多防盜，賊人想再偷都冇嘢偷，反而自投羅網。」佢仲自爆而家送畀阿姐嘅嘢都係「假」，唔係真珠寶，仲笑住話呢啲叫做「知慳識儉」。米雪聽完即刻笑住話家英哥「曳」，但又讚佢風趣。

講到家英哥今日送畀米雪嘅一支金釵，原來係「偷」自阿姐嘅收藏品。家英哥笑言：「趁阿姐唔為意就『偷』咗一支過嚟，下次再偷多幾支！」米雪就話唔驚，仲笑住話阿姐好錫後輩，應該會隻眼開隻眼閉。