張寶兒產後盆骨收窄7cm 著返港姐時期褲子 親揭為大仔做腦評測原因. 無綫藝人張寶兒（Bowie）昨日（18日）現身銅鑼灣醫療中心，為產後體態修復組合療程拍攝廣告。身為兩子之母嘅佢著上吊帶白色長裙，大騷修長身形，分享「盆骨收窄小臀術」同「韓方水光素顏針」成效。Bowie接受《香港01》訪問時話：「相信好多媽咪都明白，生完之後盆骨係會大咗，透過專業按壓同紮肚，成功將盆骨收窄7cm，𠵱家可以著返之前嘅褲，腰圍返去到參選港姐時候，自信心滿滿。」

談到大仔「袁咕碌」退學消息，Bowie透露觀察到仔仔喺學校唔太適應：「老師反映佢專注力不足，堂上坐唔定、小動作多，有時仲會自言自語。」為了解仔仔真實需求，佢帶大仔進行「腦評測」，結果顯示仔仔吸收資訊有獨特方式，並非傳統學術環境所能完全涵蓋。Bowie話：「其實呢個方法檢查好多年，好多朋友都有做，我就純粹想了解自己小朋友所以去做。做完之後令我反思，原來小朋友唔專注係因為呢啲原因，加深對小朋友嘅了解。」

Bowie透露自己嘅教育方針偏向「全人發展」，認為幼兒階段應重視睡眠、感官刺激同大肌肉發展，而非一味追求學術表現。佢話：「與其讓孩子遷就學校，不如讓教育遷就孩子。」目前大仔已轉讀更適合年齡發展嘅「超大B班」，減少學術壓力，以足夠運動量幫助穩定情緒同專注力。被問到係咪學校「投訴」仔仔唔專注，Bowie笑言：「我相信每一個小朋友入學老師都會講一兩句，我成日問老師佢返學得唔得㗎？」Bowie又話大仔雖然喺學校坐唔定，但喺屋企係稱職嘅哥哥，識得照顧細佬，會主動攞奶樽，細佬整污糟玩具時仲會幫佢抹嘴。TVB