呢場波賽後注定會有各種標題，「愛美麗」五度帶隊奪標、維拉44年後再度染指歐洲賽事冠軍… 當然開心嘅還有威廉王子，等咗咁多年，總算睇到愛隊攞番隻盃！

維拉喺半場中後段縮番後些少，反而反擊更加到肉。泰利文斯（Youri Tielemans）今季喺國內聯賽以及兩個盃賽都無任何進帳，相反來到歐羅巴聯賽就有兩粒落袋，包括今場波嘅入波。般恩迪亞（Emiliano Buendía）臨吹半場雞前一秒擴大比數，對於還未回氣嘅費雷堡而言都幾傷。呢位阿根廷翼鋒下半場又助攻摩根羅渣士（Morgan Rogers）埋齋，表現十分出色！來緊世界盃決賽週，都頗期待睇到佢嘅演出。維拉除咗進攻銳利，防守都做得唔錯。

費雷堡全場都唔係太多機會嘅情況下，後防更加患得患失。緊迫、協防補位都未有做好，留俾對手較多時間調整射門係大忌。但眾觀整個系列賽，佢哋來到決賽其實已經超額完成任務。

恭喜曬阿士東維拉🎉，自1982年奪得歐洲聯賽冠軍盃後，再度捧起歐洲賽事嘅冠軍獎盃！領隊艾瑪利就更「把炮」，分別帶領三隊唔同球會（西維爾、維拉利爾同阿士東維拉）奪得歐羅巴聯賽（包括前身歐洲足協盃）嘅桂冠，巧合地又三隊波都有「Villa」。另外值得一提嘅係，「幸運童子」嘅馬天尼斯以及積頓辛祖，睇來「腳頭」都幾唔錯👍

EUROPA League 2025/26阿士東維拉 🏆SC Freiburg 0-3 Aston Villa