倪嘉雯佛系求姻緣 關嘉敏預咗遲婚. 藝人倪嘉雯、關嘉敏、羅雪妍、鄧伊婷與黃子桐今日（25日）變身「女團」齊跳狐仙舞，為無綫劇集《香港探秘地圖》宣傳，舞姿嬌媚跳得相當唔錯。倪嘉雯話拍劇時練咗幾日，估唔到仲有肌肉記憶，又預告劇中繼狐仙舞後會有更高難度嘅舞蹈。關嘉敏笑言：「我哋只係啱啱夾咗幾次，直情可以原地出道，組成『香港探秘女團』。」
倪嘉雯話拍劇時雖然冇趁機拜姻緣石，但自言迷信，跟蘇民峰師傅學過風水，自己會喺屋企擺風水陣：「自己幾迷信，但冇特別去求姻緣，好佛系。師傅話我姻緣運都幾差，30歲前遇到嘅男仔都覺得唔啱，叫我呢幾年專心做嘢。」關嘉敏笑說：「我同你都幾似喎，係咪叫Carman姻緣運都係差？有師傅都話我會遲婚，都係叫我呢幾年專心工作。」TVB
