藝人蔡思貝、女團IdG Bubbles的小倬、夢月和Kaluen今日現身商場舉行的世界盃宣傳活動，蔡思貝表示因父親是足球迷，小時陪爸爸凌晨起身睇波，食消夜成為她睇世界盃的「初衷」，長大後都愛跟朋友趁熱鬧睇波，自從拍攝周星馳電影《女足》後對足球更有興趣。除了鍾意睇靚仔球星，認為足球賽事就好像一場戲，好多奇迹發生非常神奇。她對現場展出一件C朗2022年世界盃落場的球衣，令眼球和心靈都好震撼，尤其看到球衣上的泥迹感覺好熱血，表示要帶爸爸前來朝聖。

父親節將至，她也想買簽名球衣送爸爸做父親節禮物，笑言代替飛美加及墨西哥睇波，可以慳回不少。她又自認是慳妹，平日出入都是搭地鐵。自從離開無綫回復自由身後，思貝開始自己同客人開會接工作，透露下半年會為音樂劇綵排和開拍新戲，所以趁未開工前可以全力睇波。提到她有份參演的《女足》會否成為「都市傳說」？她表示不會，因為對導演很有信心，並透露已經完成電影配音。

另外，日前她行街被街頭攝影師要求街拍，被讚太靚唔影唔得，她表示多謝，幸好當日有化妝，感謝父母優良遺傳。早前思貝媽咪跌倒傷及腰，她表示媽媽要休養約兩個月，待骨骼愈合，近來都會花時間照顧媽咪。

至於感情事，她突然表示「好好」，原來是借世界盃表示感情生活是睇波好開心，笑言自己現在好專一向着事業，不心急拍拖，可有追求者？她笑言：「可能有，又可能冇，唔知，總之一一落閘，男仔睇完呢個訪問後唔會追我，事業行先。」港姐出身的她也有留意今屆港姐面試，並給參賽者送上加油打氣。