港姐2026｜魏欣認愛影夏日性感照 揭IG刪相原因：而家無得P圖.《2026香港小姐競選》12位候選佳麗今日（17日）於電視城首晤傳媒，5號魏欣（Etherine）憑甜美外貌同超強學歷成為大熱之一。25歲嘅佢畢業於英國愛丁堡大學，擁有工程學士同碩士雙學位，參賽前任職財富管理經理，美貌與智慧並重。

魏欣接受《香港01》訪問時透露，自細好鍾意舞台，所以參選港姐：「我覺得港姐係一個好好嘅女性舞台，去挑戰自己、綻放自己嘅Beauty。」佢話香港係一個好獨特嘅城市，希望能夠參與其中，甚至有機會代表香港，將美麗展現俾全世界。魏欣為咗選美專程由英國返港，暫時寄住喺香港親戚屋企。訓練開始咗兩日，佢笑言暫時仍好享受，學到好多嘢。佢透露以前去過尼泊爾做義工，當時挑戰更大，所以港姐訓練對佢嚟講完全應付到。

魏欣識5種語言，包括普通話、英文、廣東話、韓文同法文，但當中最弱係廣東話。訪問中佢唔小心將「韓文」講成「鹹文」，場面搞笑！被問到會唔擔心口快快講錯粗口，魏欣笑言：「當然都驚啦，但我覺得係一個學習嘅過程。參選之後我已經進步咗好多，佳麗都有幫我。」佢透露屋企人而家都會用廣東話同佢溝通苦練：「其實我爸爸媽媽係講廣東話，我三歲前都係講廣東話，只係之後出去讀書，只教普通話，所以語境變咗普通話。」

除咗高學歷，魏欣嘅身材亦相當吸睛。對於網友發現佢社交平台有唔少性感相，魏欣自信話以前喺韓國讀書時，當地好流行健身同身形管理，佢自己都有練瑜伽。佢坦言：「我都好鍾意喺夏天Post一啲自己覺得好靚、好健康嘅相，因為操fit後覺得自己好靚，所以同朋友去沙灘玩，純粹係分享健康靚相，絕對唔係刻意性感。（即係對自己身材有信心？）我都有目標，希望練到腹肌。」

不過有網友發現佢參選後刪除或隱藏咗部分相片，魏欣解釋雖然之前分享嘅相都好健康，但參選後可能帶來無謂評論，所以為咗保護自己作出整理。佢自爆：「同埋我以前好鍾意Photoshop，而家無得Photoshop嘛，所以我就Keep住No Photoshop嘅相片，自己由而家開始都No Photoshop，呈現最真實一面。」對於被指似Angelababy（楊穎），魏欣謙虛回應：「佢好靚，或者只係某啲相片角度有少少似，我自己就覺得唔係好似。」

另外，提到佳麗吳倬希突然退賽，魏欣表示好可惜。佢透露兩人私底下係好好朋友，傾過好多偈：「佢冇機會同我哋一齊出Trip，我都好Sad，但佢有佢嘅Decision，我都會好Respect，我相信佢喺任何領域都會成功。」佢透露兩人目前有透過短訊聯絡，對方狀態OK。