前意大利奧委會主席馬拉高當選意大利足總新主席，佢以68.58% 得票率壓倒艾比迪而成功當選。馬拉高喺候選人致詞時表示意大利嘅奧運代表喺上屆夏季同冬季奧運都取得歷史性最多嘅獎牌數目，而不久之前喺Milan- Cortina 舉行嘅冬季奧運會亦豎立一個國際嘅新標準，佢希望呢啲成就可以複製喺意大利足總身上。

佢認為促進青少年發展，基礎設施嘅改進係必須要嘅，而意大利足總唔單單係管理者，更加係提供靈感嘅泉源，必須要帶來更多動力，並且展望一個充滿勇氣、成功、謙遜亦都充滿野心嘅新季度，而每個人必須要捨棄個人利益，亦確保每一位都感受到自己扮演關鍵角色。

佢嘅構想仲包括提升意大利年青球員嘅價值，改變意大利U21 球員喺意甲出場時間只有2.3%嘅狀況，鼓勵使用年輕球員，加強 B隊體系。提升 Coverciano 訓練基地嘅角色，加強球探、比賽分析、運動科學、訓練模式，數據領域使用等元素嘅水平。

馬拉高亦希望改革體系，減少官僚主義，強調執行能力，並且提升意甲嘅經濟可持續性，改善球場同埋基礎設施。

據報導馬拉高當選主席，文仙尼回歸出任意大利國家隊嘅呼聲更高，另外馬甸尼、馬沙拿都有可能出任技術總監嘅角色。