苏雅琳 【壹場嚟到 X 肥大力】專訪︱Ivy So “我以為帶俾人開心好容易 但原來係好難”

又忙碌了一天。

一如既往，一臉燦爛陽光笑容的Ivy So安坐於面前，帶一點復古又帶一點性感街頭時尚混搭穿著。

今天她的最後一個訪問，跟我聊到最後一個問題，聊到這幾年來，大眾眼中「治癒系仙氣女神Ivy So」這樣的一個存在，她似是忽然有感而發，眼泛淚光，聲線帶一絲顫抖，「我曾經唔想，大家只覺得我係一個開心女仔。但出完Solo（個人單曲《給你一隻大口仔》、新歌《原地拖手》）後先發現⋯⋯我覺得開心好難⋯⋯（年紀愈大，愈難開心？）係呀！開心好似好容易，但原來係好難嘅事。」

今年24歲獅子座的她，求學期間熱愛追韓星Seventeen和EXO，深信當台上偶像，用心地把開心能量帶給台下粉絲，是塵世間最動人的一場關係。

五年前決意放棄中文大學護理系學位，參加《全民造星IV》。儘管歌藝舞藝皆只普普通通，觀眾緣卻一直大熱地居高不下。

於COLLAR女團成員人氣排名表上，經常獲取第一名。形象陽光親切，大量廣告代言工作。

一切看似風平浪靜順風順水，於她眼中，卻是艱辛與淚水的一步一腳印。22 年首次踏上紅館舞台，任張敬軒演唱會嘉賓表現失準，被網民嘲笑「走音女團」，更曾令她自信心一度跌至谷低，哭了很久，質疑自己一直在拖累其他團友。

【行屍走肉毒雞湯真係唔work!】

「過程中個壓力一直都好大，自卑嘅諗法困擾咗我好耐，曾經擊沉過我。無exactly諗到要退團，但一路問自己，適唔適合做呢一行？我嘅Talent係咪支持唔到我一路行落去？

「有時候排舞表現差，唱漏兩粒歌詞，返到屋企都好自責。

「但我好細個已經好想加入女團，咁辛苦先入咗嚟，點解唔企返起身試多一陣？

「我會形容當時自己係行屍走肉，上台時好迷惘好驚，又怕俾人感覺到畏畏縮縮。於是不停洗腦自己：台下啲人唔係嚟睇我㗎！今日只係rehearsal！雖然係穩定咗，但我望唔到台下觀眾，無咗交流。

「到咗COLLAR第二次演唱會，終於諗通咗：靠呢啲毒雞湯真係唔work！要當下enjoy每一個moment！我見到台下個燈牌，認到台下個fans，先至覺得好滿足，先至overcome到個恐懼。」

【隊友無條件互撐】

最自我懷疑時期，隊友之間的相互共情，亦是令她能撐下去的主要原因。

「女仔間唔中會對自己外貌好無信心。有時見到啲comment話我好醜樣！就會好影響到情緒，嗰日食飯時一路問自己：我係咪真係好醜樣呢？跟住(團員)Winka坐埋嚟話：『有人話我XXX，乜我真係咁差咩？』我即刻話：『你唔係呀！你好靚呀！』我都好質疑自己！跟住佢又話返我：『唔係呀！你都好靚呀！』結果我哋不停咁去互相讚對方好靚！個畫面係好好笑！但就係靠呢啲無條件去撐大家，呢幾年先可以走過好多唔開心經歷。」

【自己好嫌棄嘅，人哋好羨慕】從小已發現自己笑點很低，總給人開心果形象。小學時男同學隨口說了一個無聊笑話，全班常常都只有她一個大笑不停。

當初毅然踏入娛樂圈，最希望把這一份正能量傳遞給大眾，可惜當她於鏡頭前開朗地張口大笑時，卻換來了一堆嘲笑她「口太大笑得很醜」負評。令她後來開心時，也不敢張口大笑。更令她親筆填詞《給你一隻大口仔》來憑歌寄意。

走到了今天，還會介意別人笑她大口嗎？

「而家唔介意啦。哈哈！真係開心嘅時候，我唔想再去收埋。寫歌過程中幫我overcome咗。當時一個朋友同我講：如果你個口無咁大，你笑嘅時候，都會無咁開心！果然一個銀仔都有兩面。你自己好嫌棄嘅嘢，可能喺人哋眼中係好羨慕。好需要識得，去睇到自己靚嘅地方。」

自小已知道性格坐唔定，無辦法於辦公室做文書工作。初中時加入聖約翰救護隊，發現學到的知識，原來可以去救助別人，才一下子明白「讀書嚟有乜用」。於中文大學護理系實習的兩年間，經歷過不少生離死別，亦讓她重新去體會，「珍惜」二字的意義。

【婆婆突然走咗，忍唔住喊】

「最記得喺老人院實習嗰段日子。見到好多公公婆婆。佢哋可能已經唔記得咗自己嘅屋企人，但會好錫我哋呢班姑娘，請我哋飲湯，有啲好溫馨嘅時候。

「有日有一個婆婆，只係照顧咗佢三四日，嗰日突然之間，好多醫生姑娘衝過去急救，跟住有架車就送走咗婆婆，我個腦都未load到發生咩事，但張病床已經空咗。係好深刻嘅一次經歷。

「搭巴士返屋企時，我忍唔住流眼淚。本身以為距離好遙遠嘅事，原來可能下一秒已經會發生。係嗰一刻，令我知道要更加去珍惜，同屋企人嘅關係。」

【做到唔再娛樂到大家為止！】

不同的時代，有不同代表性的女神。Ivy So算是這世代最具話題性的女神之一。然而殘酷的是，女神最大的敵人，往往是歲月的增長。她又曾否思考過，自己能留在娛樂圈多久？

「（40歲的）芯駖曾經講過，好懷疑自己係咪適合做女團。我成日同佢講，你真係超索超正！你嘅經歷同堅強，都好inspire到我哋其他隊員。年紀我唔係真係好驚。娛樂圈都係講娛樂啫。我會做到，唔再娛樂到大家為止。哈哈！希望可以搵到，一個長遠又適合自己嘅位置。」

【我係豬扒，唔應該鍾意哥哥】

女神的感情生活，也是大眾特別去留意的一點。去年傳出她跟洪嘉豪發展地下情，她於IG限時動態以48個NO來回應。她小學時曾有過的「初戀」無疾而終，中學時也曾暗戀過一男生兩年。

「小學時暗戀過一對雙胞胎嘅哥哥。哥哥係足球隊隊長，揮灑汗水好有型好陽光。點知喺畢業表演我着嗰件衫，睇到有個肚腩仔。個細佬就笑我：豬扒呀！從此我就諗：我係豬扒，我唔應該鍾意，同佢一樣樣嘅哥哥。就放棄咗。升到上中學，暗戀咗一個男仔兩年。之後一齊咗Puppy Love。後來大家讀書都忙，就無再一齊。」

【未來男友幫我處理情緒】

今天希望有一個怎樣的男朋友？

「我間唔中都會幻想一下，如果有個男朋友陪我打機就好啦。而家細佬都算係暫時嘅替代品。我最希望男朋友可以係一個傾訴對象。我成日會喺屋企人面前故作堅強，扮晒我演藝生活無乜壓力，收埋啲情緒自己去handle。我希望男朋友，係一個可以幫助我處理情緒嘅人。」

後記：年紀愈大，真的愈不容易得到快樂嗎？

聊到於娛樂圈這幾年，她經歷了不少不安與困惑。但聊回小時候的簡單快樂，她又變回一臉小確幸。

「我細個最鍾意睇台劇，好老土㗎！《惡作劇之吻》，同埋飛輪海、炎亞綸、汪東城嗰啲「終極三部曲」，我最鍾意係《終極一家》呀！嗚拉巴哈！呀～！我嘅童年呀！好單純嘅開心。」

自言是吃貨的她，投身娛樂圈最大犠牲之一，大抵是不能再隨意地去吃。「我最鍾意食燒賣、麵包同埋炸雞！同埋宵夜係情感嘅慰藉。我好記得，中學時夜晚，同細佬兩個人煮咗四個撈麵食。呢個回憶，好想再去重現返。」

失去了的，或許無法再去重現。但失去的過程中，也得到了另一番體會。「而家慢慢適應咗，無咁唔開心。反而更加識得去enjoy食嘢時個moment。媽媽有時整咗好好味嘅燉豬肉，我而家每一啖，都會好珍惜咁去慢慢食。」

成長大概是，從擁有慢慢地換成了失去。再於失去的痕跡上，尋回過去遺忘了的，尚餘的珍貴擁有。