▪️倒敘式講番今日結束嘅幾場分組賽，先來嘅係J組。睇呢場比賽嘅時候，覺得好似2004年歐洲國家盃丹麥打和瑞典二比二嗰場…越睇越似，越睇越似… 結果就係咁，並唔意外。

賽前都一路都覺得南韓、伊朗都無謂心存僥倖，與其指望人哋點解唔自己做好一點，努力一點。南韓嘅問題之前已經講過，至於伊朗，假如泰利美射入個十二碼，又假如個入波唔係凸出半隻腳板…

▪️只有勞達路馬天尼斯（Lautaro Martínez）同伊美利安奴馬天尼斯（Emiliano Martínez）兩位常規主力，其餘九位全部係後備，加上繼續沿用嘅442陣式，阿根廷上半場嘅表現係值得稱讚。除咗盧斯素（Giovani Lo Celso）同勞達路馬天尼斯嘅入波之外，奧泰文迪（Nicolás Otamendi）半場結束前嘅頭槌差之毫釐實在可惜；下半場喺對手調整後，阿根廷出現今屆嘅首個失球，柏列迪斯（Leandro Paredes）「散步式」回防需要附上主要責任。喺美斯後備入替之後，球隊重新攞番優勢，而佢個人亦都成功收納本屆賽事第六個入波，同時三場分組賽都有入波。

約旦喺上半場防守端兩個犯錯就造成兩個失球，領隊沙林美調動之後，效果都幾立竿見影。後備入替嘅艾譚瑪利（Mousa Al-Tamari）攻入嘅呢一球，係佢哋今屆賽事嘅第三個入波，每場分組賽都有進帳，應該都感動滿意。守門員艾布拉拿（Yazeed Abulaila）係最抵打嘅一個，三個失球有兩個係罰球都係同佢企位以及指揮人牆有關。

世界盃分組賽賽事賽果-Group J約旦🇯🇴1-3🇦🇷阿根廷阿爾及利亞🇩🇿3-3🇦🇹奧地利

*阿爾及利亞同奧地利最後時刻賽和，加上之前民主剛果反吸烏茲別克斯坦，導致只得三分且得失球處於劣勢嘅南韓同伊朗都憾別美加墨。附J組分組積分排名

世界杯FIFA World Cup 2026 🇺🇸🇨🇦🇲🇽世界盃分組賽阿根廷球迷俱乐部约旦球迷俱乐部奥地利球迷俱乐部阿尔及利亚球迷俱乐部