▪️巴拉圭成為歷來第一支喺世界盃淘汰賽階段十二碼射贏德國嘅球隊！

德國佔據比賽大部分時間嘅主導權，但都係得勢不得分。法定時間雙方嘅入波都係頭槌，而夏維斯（Kai Havertz）喺取得入波之後還有一次良機可以擴大比數，但係就俾基爾（Orlando Gil）接實。拿高士文似乎唔係太多辦法破對方嘅密集防守，球員嘅決心都唔係好明確。莊拿芬泰希（Jonathan Tah）加時食詐糊，VAR顯示喺入波前安頓（Waldemar Anton）出手推開龍門嘅基爾導致入球被推翻。至於十二碼決勝，德國球員都未有嘗試「入佢中路」，三位操刀而射失嘅處理確實質量麻麻。

巴拉圭唔可以話一場比一場踢得好，但至少對比1-4輸美國嘅比賽屬於回歸正常水準。艾美朗（Miguel Almirón）坐完波監滿血回歸，對於艾法路嚟講係兵源上多番選擇。恩斯素（Julio Enciso）踢番前鋒位即刻有表現，收穫咗本屆賽事個人第一個入波；基爾無論喺常規比賽時間、加時抑或十二碼決勝都相當穩定，係球隊致勝晉級嘅重要功臣，一對中堅荷西簡拿利（José Canale）同古斯泰禾高美斯（Gustavo Gómez）都值得稱讚！

世界盃1/16淘汰賽賽事賽果-南非🇿🇦0-1🇨🇦加拿大巴西🇧🇷2-1🇯🇵日本德國🇩🇪1-1（pen：3-4）🇵🇾巴拉圭

世界杯FIFA World Cup 2026 🇺🇸🇨🇦🇲🇽1/16淘汰賽德国球迷俱乐部巴拉圭球迷俱乐部