當阿根廷以2-1淘汰英格蘭，連續兩屆打入決賽，好多人再次提起呢張舊相，因為美斯決賽嘅對手，將會係19年前俾佢親手抱過同沖涼嘅BB仔耶瑪（Lamine Yamal）。

阿根廷對西班牙，本來就有太多議題，尋晚比賽時旁述都有提到，對陣內有多位巴塞球員嘅西班牙來講，可以喺決賽對上「巴塞之神」美斯，既是巧合，亦都充滿話題性。

喺世盃開波之前，同樣來自巴塞嘅耶馬早已嶄露頭角，都被期待成可進一步證明自己，佢喺幾日前先慶祝19歲生日，前途無可限量；而美斯就經已39歲，最後一次出戰世盃，所以球迷視為世代之戰，甚至係新舊球王之戰，絕不為過。

2007年，美斯啱啱喺巴塞橫空出世，仍然係果個留住及肩長髮嘅怕醜仔，當時佢獲邀參加巴塞基金會、聯合國兒童基金會（UNICEF）及巴塞官方嘅《Diario Sport》合辦嘅慈善月曆拍攝活動，而被抽中嘅幸運兒，正係耶瑪一家。

多年後，負責拍下珍貴時刻嘅攝影師Joan Monfort表示，美斯當時相當怕醜，連點抱BB都唔識；而耶瑪只得六個月大，冇人會唸到，19年後，呢位BB仔將會喺球場上與美斯正面對決，爭奪世界盃冠軍。

世界杯FIFA World Cup 2026 🇺🇸🇨🇦🇲🇽耶瑪美斯西班牙阿根廷