【娛樂新聞】譚凱琪入稟呈請前閨密呂晶晶破產 眼濕濕嘆：友情就咁冇咗.TVB藝人譚凱琪（Zoie）近日入稟高等法院，呈請其昔日好姊妹、2004年亞洲小姐冠軍呂晶晶，以及前TVB金牌監製鄧特希破產。譚凱琪今日（22日）出席劇集《非份之罪》宣傳活動時首度開腔回應，談及與呂晶晶長達二十年嘅閨密情因財反目，一度感觸眼濕濕。

譚凱琪承認，與呂晶晶嘅友情因為金錢問題而破裂。佢透露事件已困擾一段時間，自己亦唔想行到呢一步，但無奈對方欠債後失聯，佢曾給予緩衝機會並通知將會採取法律行動，可惜一直未有正面回應，最終只能循法律途徑追討。譚凱琪未有透露欠債金額，但強調每一分錢都係自己辛苦賺嚟嘅血汗錢。佢直言以後借錢畀朋友必須三思：「除咗金錢之外，係誠信問題。（對對方好失望？）友情就咁冇咗囉！大家唔好借錢畀人。」講到傷心處，佢眼濕濕坦言：「當初係出於信任先出手幫忙，我只希望對方正視問題，畀出回應。」佢又指身邊人都好支持佢嘅決定，覺得經一事長一智。

譚凱琪上月入稟高等法院，分別向鄧特希（案件編號HCB4472/2026）及呂晶晶（HCB4473/2026）提出破產呈請，兩案已排期於9月8日開庭處理。由於入稟文件顯示兩人地址相同，意外曝光呂晶晶與鄧特希嘅夫妻關係。譚凱琪強調並非有意踢爆兩人秘婚，佢透露早年經朋友認識呂晶晶，亦曾參演鄧特希嘅作品。

鄧特希曾監製《壹號皇庭》、《妙手仁心》等經典劇集，2021年曾因欠款逾317萬元遭財務公司入稟追債，電視城外更一度被貼上追債街招。至於42歲嘅呂晶晶，過往情史豐富，曾與大佢21年嘅前亞視小生林韋辰發展「忘年戀」，亦曾與陳展鵬傳過地下情。譚凱琪同呂晶晶曾係圈中知名閨密，去年譚凱琪仍為對方慶生，大讚對方「人美心善」，如今對簿公堂，令人不勝唏噓。