【On.cc】《三代同糖》︱周志康大熱天時着超重鯊魚衫後樓梯追逐　睇見都熱

藝人周志康在《中年好聲音4》雖然7強不入，但卻贏盡觀眾支持，想不到他在處境劇《愛．回家之三代同糖》的演出，一樣成為焦點。昨晚（31日）劇情講述有「何媽」之稱周志康對同事照顧周到，卻遭吳兆麟誤認為靠討好女同事上位，二人矛盾早種。及後周志康透過視像會議開會期間表現異常，遭發現原來假借WFH之名去和仔仔玩過山車！吳兆麟之後伺機告周志康一狀，二人關係更趨惡劣，由互藐演變為惡鬥，引爆連場笑料…

昨晚吳兆麟雖然剝衫晒腹肌兼震波，但卻不及着公仔衫着到上頭頂的周志康搶焦！為了配合「瞓身賣橋」劇情，周志康大熱天時在沒有冷氣的後樓梯間，穿上「超重裝備鯊魚衫」與對方大玩「後樓梯追逐戰」，更要冒「寸步難移」之苦瘋狂「拾級而上」，最終跑樓梯跳出一身大汗及痠痛感：「呢場戲真係估你唔到成集最辛苦，因為拍嗰日真係好熱，我要著住嗰件衫配合唔同嘅角度係咁跑，真係身水身汗！加上件衫腳嘅位置因為真係好似鯊魚，所以我全程對腳都係被勒住，不過咁樣論論盡盡拍出嚟反而可能搞笑啲，所以都值得，好彩平時做開運動，飲多啖水就 ok。」對於周志康的鯊魚造型，網民紛紛留言大讚可愛，並指周志康的「何媽」入屋又討好。

昨晚周志康另一經典位，則是坐住過山車開會一幕！場口所見，一頭亂髮、開會開到「東歪西倒」的他，最終意外暴露了去了坐過山車的事實，引來有網民留言求解鎖「拍攝過程」！對此，周志康受訪時，大方透露相關場口是坐著瑜伽波、靠想像力扮坐過山車拍攝，並笑言拍畢後肌肉結實不少。最搞笑的是，為了令頭髮的狀態似足坐緊過山車，幕後同事現場有用風扇吹向周志康的頭髮，可惜最終卻因髮型set得太行而要加大力度。

周志康咁熱着超重鯊魚衫。

仲要後樓梯追逐。

睇見都熱～

辛苦喇！

吳兆麟雖然剝衫晒腹肌兼震波，都唔及周志康咁搶Fo！

不過係大隻嘅！