【On.cc】江美儀爆吳業坤曾展望唔跟大隊返酒店：佢哋去叫雞

藝人江美儀、吳業坤、朱敏瀚（朱仔）及曾展望（GM），今日（1日）出席無綫綜藝節目《試真D唷》記者會，有份拍攝的張振朗未有現身。朱仔和劉穎鏇秘密拍攝新劇，最近網上多次流出兩人拍外景的路透相，據知在劇中兩人不缺動作戲，他受訪時表示：「拍咗3個幾月，我部分已經拍完 ，但公司未公布，所以有咩同劇演員都唔可以講。（點解連開鏡儀式都冇，咁神秘？）我都唔知，我只可以講好開心遇上呢個好角色，係好難得，希望新劇可以快啲出街。（拍得辛苦嗎？）因為涉及打戲，條街又熱又曬，都幾辛苦，我都曬出背心印，但過程係好開心。（同多劉穎鏇對手）係，同佢最多，其實《飛常日誌ll》時都同佢合作，佢係個好嘅對手，正路嘅人。（佢好Fit喎。）佢幾時都Fit，我都Keep住自己嘅Fit，等自己乾身啲，啲人覺得大隻咗，其實唔係。（同劉穎鏇有感情線？）唔好問啦，我會畀人鬧㗎。」

朱仔又多謝新劇團隊，度兩日一夜時間給他回歸拍攝《試》節目，在台灣拍攝時到一間出名多曱甴的賓館逗留一小時，他說：「我要證實吓係咪多曱甴，結果喺床下底搵到曱甴一家大細，好熱鬧。」問他可怕曱甴？他搞笑謂要視乎是室內定室內：「室外曱甴可以唔理，室內就驚，拍完曱甴屋後都覺得周身痕，如果屋企有曱甴都會自己撲滅佢。」

江美儀偕吳業坤及GM接受訪問時，被問到可被兩男激親？美儀就直認：「我肥咗，因為好谷氣。」除被GM整爛其愛心的拍攝用腳架，在未問她意見下，送上非心水款項的新腳架外，他又愛拗頸及邋遢，美儀說：「佢永遠相反意見，又唔講對唔住，佢係小朋友 ，仲有次見到架車滿地稿，又多垃圾，要我執乾淨。」

GM即時向美儀道歉 ，指自己應和美儀意見一致，但講到亂丟垃圾問題，他就說：「未必係我嘅，不過其實係咪我，我都應該執番好啲稿，我就係唔夠責任感。（你個樣好委屈喎？）唔委屈。」

美儀又爆吳業坤和GM每晚都不跟大隊返酒店，但知吳業坤為節目到酒吧考察，再說：「佢哋永遠唔會叫埋我去，因為要去搵食 ，去叫雞，食自私雞，第二日就好虛，嗰度啲炸雞係好食，但唔會叫畀我食。」吳業坤就解釋因為工作時間長，所以晚上需要放鬆，每晚要食4隻雞，身形肥到快似正方形，足足多了30多磅，連太太都覺得他似大叔，因此現減肥中。至於同拍攝的張振朗，美儀大讚最得她心，尤其他識棄暗投明，但詳情則要留意節目。

江美儀同吳業坤合照。

曾展望被爆每晚都不跟大隊返酒店。

吳業坤為節目到酒吧考察。

朱敏瀚多謝新劇團隊。

江美儀話好谷氣。

嚟張大合照。