前晚兩場八強資格賽都緊張萬分，頭場中國以三分險勝波多黎各，喺最後三分鐘連入兩球三

前晚兩場八強資格賽都緊張萬分，頭場中國以三分險勝波多黎各，喺最後三分鐘連入兩球三分，先可以贏75-72；今場韓旭繼續有出色發揮，全場有21分11籃板，末段嘅三分波簡直係大心臟；張子宇亦把握到機會，上陣9分26秒就有13分。至於楊舒予亦有15分11助攻，今仗見到佢滿場飛，有時甚至拉落低位，騰出空間予韓旭，表現近乎完美，除咗罰球繼續低迷，今場射6中3，最後應該嚇出一身冷汗。

波多黎各嘅麥伊妹（Imani McGee-Stafford）有16分9籃板2封波，只係受制於「中國雙塔」，命中率不足42%，反而隊友珍妮狄（Trinity San Antonio）（呢個名真係一流）就無處不在，24分9籃板7助攻5偷波，+/-值係+35，可惜最終仍然飲恨。

意大利對澳大利亞仲激，意軍一度落後26分，但追下追下，最後甚至有機會加時，只係法蘭西絲卡（Francesca Pasa）上籃唔入，俾澳大利亞死裏逃生。