東岸兩大豪華陣容強隊對壘，騎士終於喺NBA盃報返揭幕戰落敗之仇，今仗大勝76人119-95，算係今季代表作。

騎士陣容完整，季前加入咗屈臣（Peyton Watson）及希桑查（Mario Hezonja）嘅作用亦逐漸顯現，面對四星陣容嘅76人，各人都無比專注，雖然都有第二節亂打一輪嘅問題出現，至少喺第三節中後段慢慢拉開，就再無俾76人追近。騎士有查列艾倫（Jarrett Allen）同泰臣（Jaylon Tyson）養傷，反而造就希桑查同湯馬士拜仁（Thomas Bryant），兩位從後備席上交出合共28分，非常關鍵，當然PW嘅防守同籃板亦要讚。

騎士喺整體努力下，以大量協防來補單塔不足，可以俾加盟76人後首次返到克利夫蘭嘅LBJ只得8分，恩比特（Joel Embiid）得6分，更係難得；76人雙星今場起手21只入3球，甚至係麥斯（Tyrese Maxey）命中率亦係三成三，既因騎士嘅防守，亦因為太多無耐性嘅起手。

騎士最大嘅問題，就係米曹（Donovan Mitchell）總係想將勝負一肩挑起，有時眼中只有籃框，忘記咗隊友嘅存在，今仗就出奇地合理，雖然命中率唔高，只有23分，但7籃板以及8助攻卻無比重要。要俾克利夫蘭成為他嘅城市，其實先要學學LBJ打波時嘅智慧。

內容擇自- 仙道彬手記🏀