有傳璀璨之城因劇本問題停工 監製陳維冠澄清張智霖易角傳聞
.
由張智霖、吳卓羲、張曦雯、高海寧等主演嘅新劇《璀璨之城》，六月喺珠海開鏡，拍攝得如火如荼之際，突然傳出因劇本問題要停工嘅消息，劇集監製陳維冠就親自開腔回應事件。
陳維冠話：「我地返來係想將劇本精益求精，令大家可以演得更加盡啲，我地成班演員原班人馬七月尾就會去澳門同珠海拍攝。」至於劇集出街日期，佢就話希望今年12月可以同大家見面。
有消息話張智霖有可能因為檔期問題，分分鐘要易角，監製就澄清冇咁嘅事，佢話Chilam檔期確實好滿，不過因為佢好鍾意呢個劇本，所以好盡力遷就檔期。
而對於高Ling來講就反而係一件好事，因為本身套劇嘅檔期同《新聞女王2》有少少double，依家佢就可以專心拍攝《新聞女王2》，待煞科後先全情投入《璀璨之城》。
今次套劇係Chilam同阿Ron相隔12年再度合作，加上有多位靚女坐鎮，令人相當期待。之前劇組仲同姜大衛慶祝78歲生日，成個劇組相處融洽。監製透露其實已經有唔少大場面喺珠海開始拍攝，包括John哥嘅豪華office等，七月尾開始仲會去到澳門拍攝其他大場面，包括賽車場等等，成套劇都係實景拍攝，絕對會令觀眾睇得更加投入。
