【娛樂新聞】《愛‧回家之三代同糖》8.10首播 彩虹造型拍Opening 車婉婉吳若希李茵彤三代同堂.TVB全新處境劇《愛‧回家之三代同糖》將於8月10日隆重登場，逢周一至五晚八點翡翠台播映。日前一眾主要演員以「彩虹色調」鮮艷造型雲集電視城，為劇集拍攝Opening，場面繽紛熱鬧。當中車婉婉、吳若希及李茵彤（Desta）呢個「三代同糖」組合齊齊以Candy Purple造型現身，相當搶眼。

Opening共有三個主景，包括吳若希、車婉婉、Desta嘅屋企、吳若希公司，及舅父仔李偉健經營嘅小店，全部真人拍攝配以AI生成嘅夢幻繽紛場景，現場仲有大量巨型糖果道具配合「同糖」主題，非常有心思。拍攝當日劇集雖未正式開工，但婉婉同Desta呢對「婆孫」已零隔膜，鏡頭前大擺親密甫士盡顯默契。吳若希先後以黑白女強人造型同Purple Lady現身，與劇中「死對頭」趙浚承大擺「史密夫決戰史密妻」Chok甫，望落相當吸引。

首次亮相《三代同糖》嘅何依婷，以迷人Pink OL造型登場，向劇中老闆仔容天佑獻殷勤，相當搞笑。佢受訪時笑指自覺冇幽默感，故事前做足功課，諗好多方向令角色更有喜感。飾演佢同事嘅周志康就話角色係公司「潤滑劑」兼女人湯圓，同好多女同事好Friend，連生理期問題都會傾，仲自爆「何媽」角色會隨身帶備衛生巾，相當爆笑。TVB

首次參演處境劇嘅趙浚承，首擔大旗即挑戰奸角，為配合「退役男團」設定，被監製勒令增肌兼要夠Chok。飾演佢細佬嘅侯雋熙（Duncan）就相反被要求變瘦，笑言可將私家蛋白粉借畀對方。吳若希受訪時大讚劇情極生活化，鬥嘴得嚟好笑又貼地；車婉婉就話接棒處境劇有使命感，希望做好娛樂陪伴觀眾。唔少粉絲都對呢套新劇充滿期待。