【On.cc】佘詩曼準備放假一個月 鍾柔美再次澄清緋聞
視后佘詩曼（阿佘）今日（2日）以代言人身份出席品牌活動，同場有鍾柔美、黃建東及湯寶如等，場面相當熱鬧。阿佘甫到場即被大批嘉賓圍觀兼要求影合照，她一一滿足大家要求，受訪時她透露即展開悠長假期：「起碼一個月，好想放空休息，Hea吓同埋陪吓屋企人。呢段拍《新聞女王2》嘅日子好似錯過咗好多好嘅電影及劇集，都想煲吓。」
當被到是否要放下「Man姐一角」，她笑言：「唔捨得地放下，記得有一場戲講我離開間公司，排戲嗰陣已經喊晒，真係頂唔順！同台前幕後朝夕相對，劇情又講我哋一齊創業，難免忍唔住。」她又指早前一場落水戲搞到耳朶入水，及後徵詢過很多人的意見，用了很多方法，目前已冇大礙：「側住入水嗰邊嚟瞓，應該啲水流番晒出嚟嘞。」
至於有傳《新聞女王2》將於年底推出，很大機會會成為台慶劇，阿佘說：「我淨係知監製啲時間好趕，要不停咁剪片，要剪過最好嘅Version出嚟，最緊要品質出嚟係好嘅。（會唔會畀吓意見？）拍嘅時候我都參與咗好多部分，咁我都相信自己會去睇剪片嘅，八吓兼先睹為快，睇吓拍咗幾個月出嚟嘅成績會係點。（想再衝擊視后寶座？）其實已經好滿足，會唔會錦上添花就遲啲先講啦。」
鍾柔美受訪時再次澄清緋聞，表示當日睇戲同行男子只是同學，日後會小心處理這些問題。當被問到為何與對方約會，她回應：「嗰日我好多嘢要處理，臨時臨急搵朋友陪，佢係最快覆機嗰個咋，搞到佢都真係唔好意思。（佢追你？）冇喎，大家係朋友，其實如果有啲咩事，我會親口同大家講㗎嘞。」她又透露近日趁暑假出海玩衝浪，由於首次能夠「上水」，令她很有自豪感，覺得自己這方面有天份：「我仲拍咗啲片，遲啲會喺社交網同大家分享。」
另外，同場黃建東談到好友戴夢夢有喜，即開心表示：「我係一早知道嘅，佢為咗個BB歷盡艱辛，我好開心！當日請佢嚟生日會，我都有問佢方唔方便，使唔使準備啲咩畀佢食，佢又好大方話冇問題，已經乜都食得。（你做咩錫人哋？）我份人比較熱情，同埋角度問題，只係錫吓塊面啫。（佢依家有咗幾多個月？）我淨係知佢年底生得。（做契爺？）好多人排隊喎，我淨係同佢講自己好鍾意食薑醋，叫佢留番碗畀我。」
佘詩曼拍完《新聞女王2》啦！
佘詩曼準備放假一個月。
有得抖吓啦！
鍾柔美再次澄清緋聞。
鍾柔美日後會小心處理問題。
加油呀！
黃建東自認份人比較熱情。
朱智賢
南皇娱乐城
[爱心][爱心][爱心]